Joze Mourinyonun ''Fənərbaxça''ya verdiyi nadir faydalardan biri gənc Yusuf Akçiçəkin ulduzunun parlaması oldu.

''Football-plus.az'' xəbər verir ki, İstanbul nəhənginin öz yetirməsi olan istedadlı müdafiəçi bu mövsüm bir sıra matçlarda şans qazanaraq özünü yaxşı tərəfdən göstərdi və Avropa klublarının diqqətini cəlb etdi. Yusufa uzun müddətdi, maraq göstərən əsas klub Fransa nəhəngi ''Marsel''di. Bir müddət öncə bu klubun rəsmilərinin ''Fənər''in vitse-prezidenti Acun Ilıcalı ilə görüşdüyü də iddia edilmişdi.

Bu arada Türkiyə mətbuatının yazdığına inansaq, ''Marsel'' 19 yaşlı futbolçuya görə ''sarı-lacivərdlilər''ə 15 milyon avro təklif edib! Ancaq bu təklif ''Fənər''i qane etməyib. Danışıqlar davam edir. İstanbullular Yusufu 20 milyon avrodan aşağı qiymətə buraxmaq istəmir. Keçid bu məbləğə baş tutsa, Yusuf adını klub tarixinə yazdıracaq. O, Kim Min Ceni geridə qoyaraq ''Fənərbaxça''nın ən baha qiymətə satdığı mərkəz müdafiəçisinə çevriləcək.

Kim Min Ce 2022-ci ildə ''Napoli''yə 18 milyon avroya transfer edilmişdi. Akçiçək bu mövsüm 18 rəsmi matçda forma geyərək komandaya 2 qol, 1 məhsuldar ötürməlik fayda verib.