İllərdi davam edən çempionluq həsrətinə heç cür son qoya bilməyən ''Fənərbaxça''nın yayda heyətdə yenidən ciddi dəyişikliklərə gedəcəyi gözlənilir.

''Football-plus.az'' az xəbər verir ki, rəhbərlik ayrılmaq ehtimalı olan bəzi futbolçuların dəyərini müəyyənləşdirib.

Bu mövsüm komandanın sürpriz isimlərindən olan Oğuz Aydına Avropa klubları maraq göstərməkdə davam edir. 24 yaşlı vinger ən çox Fransa nəhəngi ''Marsel''in diqqət mərkəzindədi. Joze Mourinyonun 3 müdafiəçili sistemdə cinah oyunçusu kimi yararlandığı Oğuz bu mövsüm 25 rəsmi oyunda 6 qol, 8 məhsuldar ötürmə ilə fərqlənib. Türkiyə yığmasının son oyunlarında da məhsuldar ötürmələri ilə ön plana çıxan istedadlı futbolçunu təbii ki, ''Fənər'' elə-belə məbləğə əldən buraxmaq niyyətində deyil. Rəhbərlik 2028-ci ilə qədər müqaviləsi olan Aydına görə 20 milyon avrodan aşağı olan təklifləri dəyərləndirməyəcək. Yeri gəlmişkən, ''Marsel'' ''Fənər''in daha bir üzvü Yusuf Akçiçəklə də ciddi şəkildə maraqlanır. Hətta iddialara görə bu futbolçunun meneceri Mirsad Türkcan başqan Əli Koçla görüşərək transferi müzakirə edib. ''Fənərbaxça'' öz yetirməsi olan və Mourinyonun sayəsində ulduzu parlayan gənc müdafiəçini də 20 milyon avrodan aşağı qiymətə satmaq istəmir.

Bundan başqa Sebastyan Şimanski də artıq ilk vaxtlarda olduğu qədər toxunulmaz görsənmir. ''Sarı-lacivərdlilər''ə 2023-cü ildə Moskva ''Dinamo''sundan 9,75 milyon avroya transfer olunan polşalı futbolçu ilk mövsümdə 55 rəsmi oyunda həm qol (13), həm də məhsuldar ötürmə (19) baxımından ikirəqəmli həddə çatmışdı. Bu mövsüm isə 25 yaşlı futbolçu 48 rəsmi oyunda yalnız 7 qol, 9 məhsuldar ötürmə ilə fərqlənib. Düzdü, Mourinyo bəzi matçlarda onu sol müdafiəçi kimi oynadıb. Amma ümumilikdə Şimanskinin məhsuldar hərəkətləri və faydalılığı azalıb. Transfer dəyəri 17 milyon avro civarında olan və klubla 2027-yə qədər müqaviləsi olan yarımmüdafiəçiyə görə də ''Fənər'' rəhbərliyi ən azı 20 milyon avro qazanmağa çalışacaq. Qapıçı Daniel Livakoviç üçün 10 milyon avro tələb olunacaq.

Bu oyunçulardan başqa yayda Duşan Tadiç, Edin Ceko, Rodriqo Bekao, Brayt Osayi-Samuel, Aleksander Ciku, İsmayıl Yüksək, İrfan Can Kahveci, Cenk Tosun kimi isimlərin də ayrılacağı istisna edilmir.

Alan Sen-Maksimen isə müqaviləsi müddəti başa çatacağı üçün yayda müqavilə ilə məxsus olduğu Səudiyyə Ərəbistanı təmsilçisi ''Əl-Əhli''yə dönəcək.