Tez-tez adı ''Qalatasaray''la yanaşı hallanan və uşaqlıqdan bu klubun azarkeşi olduğunu heç vaxt gizlətməyən Hakan Çalhanoğlu ilə bağlı maraqlı xəbər yayılıb.

"Football-plus.az" xəbər verir ki, Türkiyə çempionu artıq tanınmış futbolçunun transferini reallaşdırmaq üçün ciddi addımlar atmağa hazırlaşır. Fabritsio Romanonun xəbərinə görə ''Qalatasaray'' bu həftəiçi Hakanın meneceri ilə görüşərək bu keçidin detallarını müzakirə edəcək. Ona görə də ''İnter''in üzvünün meneceri Qordon Stipiçin ən qısa müddətdə İstanbula gələcəyi gözlənilir. Bu arada dünən şayiələri artıran daha bir diqqətçəkən olay yaşandı.

Hakanın atası Hüseyin Çalhanoğlu öz ''instaqram'' səhifəsinin hekayə bölümündə maraqlı bir paylaşım etdi. Hakanın müxtəlif şəkillərindən kollaj düzəldən atası ora ''inşallah bir gün ''Qalatasaray''ımıza da gələrsən'' ifadəsini yazmaqla klubun bütün fanatlarını həyəcanlandırdı. Amma hələlik bu transferin hansı şərtlərdə baş tutacağı məlum deyil. Çünki ''İnter'' ən azı 40 milyon avro tələb edirsə, ''Qalatasaray'' maksimum 15 milyon avro təklif etməyə hazırdı. 31 yaşlı futbolçuya Səudiyyə Ərəbistanı klubları da maraq göstərir.

Türkiyə yığmasının kapitanı ötən mövsüm Milan nəhənginin heyətində 47 rəsmi oyuna çıxaraq 11 qol, 8 məhsuldar ötürməlik fayda verdi. Transfer dəyəri 35 milyon avro civarında olan Hakanın ''İnter'' ilə 2027-yə qədər müqaviləsi var.