''Fənər''də ''yarpaq tökümü'' başladı, iki ulduz vidalaşdı
Bu yay heyətdə ciddi dəyişikliyə gedəcəyi gözlənilən ''Fənərbaxça''da belə desək, yarpaq tökümünə start verildi.
Müqavilə müddəti başa çatan iki ulduz - Edin Ceko və Duşan Tadiç ilə yollar rəsmən ayrıldı. Dünən klubun bazasında təcrübəli futbolçular üçün kiçik bir vida mərasimi təşkil olundu.
Başqan Əli Koç, vitse-prezident Acun Ilıcalı və baş məşqçi Joze Mourinyonun iştirak etdiyi tədbirdə bu futbolçulara xatirə hədiyyəsi verildi. Əli Koç hər iki ulduzu xoş sözlərlə yola saldı:
''Hər yaşda oyunçular üçün hər zaman örnək olacaqsız. Sizə baxarkən sanki karyeralarına yeni başlamış, ac, canla-başla çalışan 19-20 yaşlı futbolçular görürəm. Bundan sonrakı həyatınızda sizə uğurlar arzulayıram. Vidalaşırıq, amma İstanbulda hər zaman bir ailəniz olacaq. Bizim üçün etdiyiniz hər şeyə görə həm öz, həm də camiənin adından sizə təşəkkürümü bildirirəm''. Ceko ''bu klub üçün hər şeyimi verdim və ''Fənərbaxça''ya gələcəkdə yalnız uğurlar arzulayıram. Bu klub və xüsusilə də fanatlar sevinməyə layiqdi. Hər şey üçün təşəkkürlər'' dedisə, Tadiçin sözləri belə oldu: ''Burda iki gözəl il keçirdim. Burdan təmiz qəlblə ayrılıram və ən önəmlisi də budu. Sizi tanıdığım və bu klubun şərəfini qoruduğum üçün xoşbəxt və qürurluyam. Bəlkə də gələcəkdə yenidən bir-birimizi görəcəyik''.
Hər iki futbolçu ''Fənər''ə 2023-ün yayında gəlmişdi. Ceko bu klubda indiyə qədər 99 rəsmi oyunda aktivinə 46 qol, 18 məhsuldar ötürmə yazıb. ''Konyaspor''la matçda onun sonuncu - 100-cü rəsmi oyununu keçirəcəyi gözlənilir. Tadiç isə ''sarı-lacivərdlilər''də 109 rəsmi oyuna çıxaraq aktivinə 29 qol, 32 məhsuldar ötürmə yazdı. Onun ''Konyaspor''la matçda iştirak etməyəcəyi və şənbə günü İstanbuldan ayrılacağı gözlənilir. Qarşıdakı günlərdə Filip Kostiç, Brayt Osayi-Samuel, Alan Sen-Maksimen, Milan Şkrinyar və idman direktoru Mario Branko ilə də yolların ayrılacağı gözlənilir. Joze Mourinyo isə yeni mövsümdə də komandanın başında olacaq.
Digər xəbərlər
