Joze Mourinyonu baş məşqçi postuna gətirən və heyətinə bir sıra dünya ulduzlarını cəlb edən “Fənərbaxça” transferdə yenidən fəallaşıb.

"Football-plus.az" xəbər verir ki, İstanbul nəhəngindən fanatları sevindirən xəbərlər gəlməkdədi. Fərdi Kadıoğlu satılandan sonra müdafiənin sol cinahının gücləndirilməsinə ehtiyac duyan “Fənər” Filip Kostiçi Türkiyəyə gətirib. Tanınmış serbiyalı futbolçu sentyabrın 8-də İstanbula ayaq basıb. Klub tərəfindən verilən rəsmi açıqlamada həm Kostiç, həm də onun klubu “Yuventus”la anlaşma əldə olunduğu deyilib. Amma qəzet çapa gedənə qədər transferin şərtləri rəsmi şəkildə açıqlanmamışdı. Ona görə də detallar barədə məlumat yoxdu.

“Fənərbaxça”nın digər serbiyalı ulduzu Duşan Tadiçlə yaxın dost olan Kostiçin Türkiyəyə gəlməsində Mourinyonun rolu böyük olub. Yeri gəlmişkən, Kostiç əslində son günlərə qədər “Qalatasaray”a keçməyə daha yaxın idi. “Cim-Bom” “Yuventus”a və futbolçuya rəsmi təklif irəli sürəndən sonra bir neçə günlük geri çəkildi. “Fənər” rəhbərliyi də məhz bundan yararlanıb keçidi tamamladı. “Sarı-lacivərdlilər”in araya girməsindən sonra “sarı-qırmızılar” “Yuve”yə 6 milyon avro, Kostiçin özünə isə illik 3,5 milyon avro təklif etdi. Amma artıq iş işdən keçmişdi.

1992-ci il təvəllüdlü Kostiç “Radinçki”nin yetirməsidi və karyerasına da bu klubda start verib. Daha sonra “Qroningen”, “Ştutqart” və “Hamburq”da top qovub. Onun ulduzu Frankfurt “Ayntraxt”ında parlayıb. Bundesliqa təmsilçisində 4 il forma geyən təcrübəli solaxay futbolçu bu komanda ilə Avropa Liqasının qalibi olub. “Ayntraxt”da 172 rəsmi oyunda 33 qol, 64 ötürməlik performans sərgiləyən Kostiç 2022-nin yayından bəri 14,7 milyon avroya transfer olunduğu “Yuventus”un şərəfini qoruyurdu.

Ötən mövsümü 33 oyun 4 məhsuldar ötürmə göstəriciləri ilə tamamlayan Kostiç ümumilikdə “Yuve”də 87 rəsmi iyunda 3 qol, 15 məhsuldar ötürməlik performans sərgilədi. Onun Turin nəhəngi ilə 2026-ya qədər müqaviləsi var idi. Kostiçin ən diqqətçəkən özəlliyi odu ki, indiyə qədər qol vurduğu 70 fərqli qarşılaşmada onun komandaları cəmi 5 dəfə məğlub olub!

“Fənər”in transfer etdiyi digər futbolçu isə argentinalıdı. Sohbət “Boka Xuniors”un 22 yaşlı üzvü Kristian Medinadan gedir. Mourinyonun transferini israrla tələb etdiyi bu futbolçu ilə bağlı uzun müddətdi aparılan danışıqlar, nəhayət, uğurla yekunlaşdı. Amma onun İstanbula gəlişi yanvardan tez baş tutmayacaq. Çünki Argentinada mövsüm davam edir. İki klub arasında anlaşmaya əsasən Medina Cənubi Amerikada futbol mövsümü bitəndən sonra “Fənər”ə qoşulacaq. “Boka”nın öz yetirməsi olan bu futbolçu ilə üçillik anlaşma əldə olunub. Bu transfer İstanbul nəhənginə “15+5” milyon avroya başa gələcək.

Medina Türkiyəyə gələnə yaxın zədələnərək uzun müddətə sıradan çıxsa, argentinalılar istanbullulara təzminat ödəyəcək. “Fənər”in hətta zədənin ağırlığından asılı olaraq müqaviləni ləğv etmək haqqı da var.

Həm hücumameyilli, həm də müdafiəyəmeyilli yarımmüdafiəçi kimi oynayan Medina indiyə qədər “Boka”da 155 rəsmi oyunda 9 qol, 11 məhsuldar ötürməlik performans sərgiləyib.