Türkiyə yığması Amerikada ikinci yoxlama oyununu keçirdi.

"Football-plus.az" xəbər verir ki, Vinçentso Montellanın komandası bu dəfə Şimali Karolinada yerləşən ''Kenan Stedium''da Meksika ilə qarşılaşdı.

Qeyd edək ki, bu komandalar tarixdə ilk dəfə üz-üzə gəldi. ''Ay-ulduzlular'' ümumilikdə pis təsir bağışlamadılar. Qardaş ölkənin komandası təkcə ilk yarıda qapıya 12 zərbə endirdi. Amma Türkiyə əsas olanı edə, yəni topu qapıdan keçirə bilmədi. Karyerasını AEK-də davam etdirən Orbelin Pinedanın ilk yarının son anlarında vurduğu qol oyunda yeganə oldu və Meksika 1:0 hesabı ilə qalib gəldi. Azarkeşlərin meydana çıxması üzündən oyun iki dəfə dayandırıldı.

Onu da bildirək ki, Montella iki futbolçuya yığmada debüt etmək imkanı verdi. Mövsümü ''Kasımpaşa''da tamamlayan, amma hələ qışdan etibarən ''Aston Villa''nın futbolçusu olan Yasin Özcan debüt matçındaca start heyətində meydana çıxaraq fasilədə əvəzləndisə, mövsümü icarə əsasında ''Riu Ave''də keçirən ''Beşiktaş''lı Dəmir Ege Tıknaz 77-ci dəqiqədə meydana daxil oldu. Beləliklə, bu komandaların tarixdəki ilk duelində sevinən Meksika oldu.

Türkiyə ABŞ turnesini bir qələbə, bir məğlubiyyətlə tamamladı. İyunun 7-də türklər ABŞ-ı 2:1 hesabı ilə yenmişdilər. Türkiyə növbəti oyunlarını sentyabrda keçirəcək. Bu komanda həmin ay DÇ-2026-nın seçmə mərhələsi çərçivəsində Gürcüstan və İspaniya ilə qarşılaşacaq.