İyunun 2-dən Amerikada olan Türkiyə yığması dünən okeanın o tayında ilk yoxlama oyununu keçirib.

"Football-plus.az" xəbər verir ki, qardaş ölkənin komandası Konnektikut əyalətində yerləşən ''Pratt Uitni Stedium''da ABŞ yığması ilə üz-üzə gəlib.

Görüş qonaqlar üçün uğursuz başlayıb. Artıq 1-ci dəqiqədə Cek Makqlinn amerikalıları hesabda önə keçirib. Ancaq Türkiyə tədricən toparlanaraq üstünlüyü ələ alıb. Vinçentso Montellanın komandası hələ fasiləyə qədər geridönüş etməyi bacarıb. 24-cü dəqiqədə Arda Gülər bir qədər kuryoz qol vurdu. 27-ci dəqiqədə isə Kərəm Aktürkoğlu qapı önündə yaranmış qarışıqlıqdan əla istifadə etdi.

İkinci hissədə başqa qol olmadı. Beləliklə, Türkiyə əzmkar qələbə ilə yüksəlişini davam etdirdi. Martda Millətlər Liqasının pley-offunda Macarıstanı hər iki matçda yenərək A liqasına yüksələn ''ay-ulduzlular'' ardıcıl 3-cü qələbəni bayram etdilər. Son 9 oyunda isə Türkiyənin cəmi 1 məğlubiyyəti var (6 qələbə, 2 heç-heçə). Türkiyə tarixi ərzində ABŞ-a qarşı keçirdiyi 5-ci oyunda 2-ci qələbəsini qazandı (1 heç-heçə, 2 məğlubiyyət).

Bu rəqib üzərində buna qədər ilk və yeganə qələbə 2003-cü ildə Konfederasiyalar kubokunda əldə olunmuşdu.

Türkiyə Amerikada 2-ci yoxlama oyununu iyunun 10-dan 11-nə keçən gecə Meksikaya qarşı keçirəcək. Bu komandalar tarixdə ilk dəfə üz-üzə gələcək.