Azərbaycan – Macarıstan oyununu Viktor Şimusikin rəhbərliyi altında Belarusdan olan hakimlər briqadası idarə etdi.

"Football-plus.az" xəbər verir ki, referi bacardıqca oyunun tempinə xələl gətirməməyə çalışdı.

Oyunun baxımlı alınmasında, yəqin ki, referinin də payı var. Cavab qolumuzda top Renat Dadaşovun əlinə dəysə də, hakim qolu qeydə aldı. Bəlkə oyunun tempinin yüksək olmasına belaruslu referi istəmədən də qatqı verdi. Təsadüfi deyil ki, ilk yarıya bir dəqiqə də artırılmadı. İlk hissədə bacardığı qədər vərəqədən də qaçdı. Oyunun xarakterinin buna müəyyən qədər təsiri olsa da, hakimin də haqqını yemək olmaz.

Millimizin məşqçisi Rəşad Eyyubov xüsusilə ilk yarıda, demək olar ki, yığmamızın əleyhinə verilən hər qərarda Cavid Cəlilova etiraz edirdi. Cavid isə baş hakimi dəstəkləyirdi. İkinci hissədə daha sərt oyuna tamaşa etdik. Referi Emin Mahmudovu bir neçə epizodda bağışlasa da, ilk rəsmi xəbərdarlığını 54-cü dəqiqədə etdi.

Maraqlı məqam odu ki, sonradan meydana çıxan altı futbolçumuzdan üçü – Toral Bayramov, Xəyal Əliyev və Rauf Rüstəmli sarı vərəqə aldı.

MÜZƏFFƏR QULUZADƏ