“Referi hər iki tərəfə münasibətdə ədalətli qərarlarla yadda qaldı”
Dünən yığmamız seçmə mərhələ çərçivəsundə səfərdə Estoniya ilə qarşılaşdı.
"Football-plus.az" xəbər verir ki, oyunu Robert Şröder başda olmaqla almaniyalı hakimlər briqadası idarə etdi. Oyun xırda və taktiki follar sarıdan zəngin keçdi. 45+1-ci dəqiqədə Rahilin iti bucaq altından qapı önünə ötürməsi zamanı top müdafiəçinin əlinə dəydi. Həmin an hakimin diqqətindən qaçdı. Buna görə referiyə etiraz edən Mahirə sarı göstərildi. Lakin VAR otağından siqnal gəldi. Referi özü monitora yaxınlaşıb epizodu dəyərləndirəndən sonra “nöqtə”ni göstərdi. Topa yaxınlaşan Şeydayev fərqi artırdı. Hakimlər briqadasının işini qiymətləndirmək üçün Tahir Süleymanova müraciət etdik:
"Alman referi üçün oyunu idarə etmək elə bir çətinlik törətmirdi. Orta tempdə keçən qarşılaşmada baş hakim sərt oyuna imkan vermir, sarı vərəqəyə çəkən epizodlarda futbolçular dərhal rəsmi xəbərdarlıqla üzləşirdi. Eynilə mübahisəyə meylli oyunçular da cəzalandırılırdı. Hakimin belə idarəçilik tərzi sürətin qalxmasına imkan vermir, futbolçular daha ehtiyatlı oynamağa məcbur olurdu. Penalti epizodunda VAR sistemi də referinin köməyinə çatdı, obyektiv qərarın verilməsində yardımçı oldu. Fasilədən sonra hesabda geri olan estonlar ərazi üstünlüyünü tam ələ alsa da, baş hakim görüşə tam nəzarət edirdi. Ümumiyyətlə, referi oyun ərzində hər iki tərəfə münasibətdə ədalətli qərarlarla yadda qaldı".
ABDULLA İSMAYILOĞLU
Digər xəbərlər
