''Trabzonspor''un Pedro Maleyro ilə vidalaşmağa hazır olduğunu xəbər vermişdik.

Portuqaliyalı futbolçunun vətəninə yollanacağı və ''Sportinq''lə müqavilə imzalayacağı gözlənilirdi. Amma son anda sürpriz yaşandı. 24 yaşlı futbolçu ''Sportinq''ə yox, Birləşmiş Ərəb Əmirlikləri təmsilçisi ''Əl-Vəsl''ə transfer olundu.

"Football-plus.az"ın məlumatına görə, tərəflər arasında dördillik anlaşma əldə olunub. ''Əl-Vəsl'' ''Trabzonspor''a 7 milyon dollar ödəyəcək. Müqavilədə 1 milyon dollar bonuslar da nəzərdə tutulub. Bundan başqa futbolçunun növbəti satışından qaradənizlilərə 15 faiz pay veriləcək. Bu transfer artıq hər iki klub tərəfindən rəsmən açıqlanıb.

Qeyd edək ki, ''Trabzonspor'' müdafiənin sağında oynayan Maleyronu ötən yay ''Boavişta''dan 2 milyon avroya transfer etmişdi. Performansı ilə diqqət çəkən və komandasının ən yaxşı oyunçularından olan Maleyro 43 rəsmi oyunda komandasına 6 qol, 5 məhsuldar ötürməlik fayda vermişdi.