''Trabzonspor'' 2 milyona aldığı oyunçunu 7 milyona satır

''Trabzonspor''un geridə qoyduğumuz mövsümdə ən diqqətçəkən oyunçularından biri portuqaliyalı Pedro Maleyro oldu. Amma 24 yaşlı sağ müdafiəçi tezliklə komandanı tərk edə bilər.

"Football-plus.az" xəbər verir ki, bir çox klubun diqqət mərkəzindədi. Türkiyə mətbuatının yazdığına inansaq, artıq Lissabon nəhəngi ''Sportinq'' bu oyunçuya görə qaradənizlilərə 7 milyon avro təklif edib. Əlavə 2 milyon avro məbləğində bonuslar da nəzərdə tutulub.

Danışıqlar prosesi davam edir. Trabzon təmsilçisi Maleyronu bu qiymətə sata bilsə, cəmi 1 mövsüm ərzində bu futbolçunun sayəsində ən azı 5 milyon avro gəlir əldə etmiş olacaq. Çünki Maleyro ötən yay ''Boavişta''dan cəmi 2 milyon avroya transfer edilib.

İstedadlı futbolçu Türkiyədə ilk mövsümünü keçirməsinə və müdafiəçi olmasına baxmayaraq 33 superliqa matçında aktivinə 6 qol, 5 məhsuldar ötürmə yaza bildi. Hücuma tez-tez dəstək verməsi ilə diqqət çəkən Maleyro 19-cu turda ''Antalyaspor''la ev oyununda (5:0) hətta het-trik etmişdi.