''Trabzonspor''un öz yetirməsi olan gənc mərkəz müdafiəçisi Ahmetcan Kaplanın Niderland nəhəngi ''Ayaks''a transferi rəsmən açıqlanıb.

Football-plus.az xəbər verir ki, Amsterdam təmsilçisi 19 yaşlı futbolçuya görə 9,5 milyon avro ödəyəcək. Ahmetcan ilə beşillik müqavilə imzalanıb.

Bundan başqa istedadlı oyunçunun gələcəkdə başqa kluba satışından əldə olunacaq məbləğin 15 faizi də trabzonlulara çatacaq. 2013-cü ildən ''Trabzonspor''un akademiyasında yetişən Ahmetcan 2020-də ilk peşəkar müqaviləyə imza atmış və ötən mövsüm əsas komandada debüt etmişdi. Kaplan 2021/22-də 13-ü superliqa, 5-i ölkə kubokunda olmaqla 18 rəsmi oyunda ümumilikdə 1214 dəqiqə meydanda oldu. Bu müddət ona adını klub tarixinə yazdırmaq üçün kifayət etdi. Belə ki, Ahmetcan Yusuf Yazıcı (17,5 milyon avro) və Aleksander Sörlotdan (10) sonra kluba tarixində ən baha qiymətə satılan 3-cü futbolçu oldu. Gənc istedad hətta Gökdəniz Karadəniz və Fatih Təkkə kimi əfsanələri də qabaqladı. Təkkə 2006-da ''Zenit''ə 7,5 milyon avroya, Karadəniz isə 2008-də ''Rubin''ə 8,7 milyon avroya transfer olunmuşdu. Maraqlıdı ki, əks istiqamətdə də oyunçu transferi baş tuta bilər.

Belə ki, ''Trabzonspor'' ''Ayaks''ın gənc oyunçularından olan Naci Ünvarla danışıqlar aparır. ''Ayaks''da az oynamaqdan şikayətlənən türkəsilli futbolçu bir illik icarə əsasında Trabzona yollana bilər.