“Macarıstan oyununa hazırlıq planlı şəkildə davam edir. Daha öncə rəsmi səhifəmizdə də qeyd etdiyimiz kimi, azarkeş birliyində struktur dəyişikliyinə getmişik və bu çərçivədə 1250 nəfərin üzvlüyü dayandırılıb. Bu qərar uzunmüddətli fəaliyyətimizdə bir dönüş nöqtəsi olmaqla daha sistemli və məqsədyönlü bir təşkilatlanmanı hədəfləyir. Bizim üçün əsas meyar, sadəcə, stadionda iştirak deyil. Dəstəyin davamlı və səmimi olması önəmlidi. Bu səbəbdən də azarkeş birliyimizə üzv qəbulunu yenidən açmışıq, lakin bu dəfə üzvlük yalnız müsahibə əsasında həyata keçirilir. İstəyirik ki, tribunada bizimlə birgə olan hər kəs bu yolun məsuliyyətini və mənəvi dəyərini dərk edərək bu mühiti paylaşsın. 2010-cu ildə "Sector 11” ilə çıxdığımız bu yolda məqsəd təkcə dəstək vermək deyil, həm də milli komandanın yanında dayanan mədəni, intizamlı və məqsədli azarkeş platforması yaratmaqdı. Bu gün də həmin məqsədə sadiq qalaraq, birlik daxilində yeniliklərə yer veririk. Latviya və Macarıstan ilə qarşılaşmaların yoldaşlıq oyunu olması bizim üçün oyunun əhəmiyyətini azaltmır. Milli komandanın hər matçı bizim üçün vacibdi, çünki burda təkcə futboldan deyil, ortaq məsuliyyətdən və ümumi dəstəkdən söhbət gedir. Komandamızın son ev qələbəsi 2024-cü ilin martında Monqolustana qarşı, rəsmi oyunlardakı son qələbəsi isə 2023-cü ilin noyabrında İsveçə qarşı olub. Bu nəticələr bizim üçün biabırçı səviyyədədi, amma biz tribunada olmağa və dəstəyimizi göstərməyə bayrağımız üçün davam edəcəyik. İnanırıq ki, müsbət dəyişikliklər üçün sabit və ardıcıl dəstək həmişə vacib rol oynayır. Qısası, bu gün bizim üçün saydan çox keyfiyyət və dəyərlər önəmlidi. Qarşıdan gələn oyunlarda da bu yanaşma ilə davam edəcəyik”.