“Uzun müddət idi tribunaya gəlməyə ara vermişdim. 2010-cu ildə təsis, 2013-cü ilə qədər rəhbərlik etdiyim “Sektor 11”in bu müddətdə əldə etdiyi uğurlar hələ də Azərbaycan tribunalarında gözəl xatirə kimi qalmaqdadı. “Göyqurdlar”ı təsis etməyimin əsas səbəbi milli komandanın bu çətin günündə azarkeşləri tribunaya gətirməkdi. Bildiyimiz kimi, yığmamız son illər bir o qədər də ürəkaçan nəticələr göstərmir, bu da azarkeşlərin stadiondan soyumasına gətirib çıxarıb. Uzun aradan sonra Estoniya səfərində “Milli Dəstə”nin rəhbəri, əziz dostum Şamil Mustafayevlə matçı izlədim. Yaxın dostlarımızla etdiyimiz müzakirələr sonrası yenidən tribunalara qayıdıb azarkeş qrupu təsis etməyə qərar verdim. İlkin olaraq millimizin Avropadakı oyunlarında “Milli Dəstə” ilə iştirak edib səfər matçlarında dəstək verməyi və Avropada yaşayan millətçi gəncləri sıralarımıza qoşaraq dərnək kimi fəaliyyət göstərməyi düşünürdük. Ancaq milli komandamızın ev oyunlarındakı azarkeş dəstəyinin zəifliyini və ölkəmizdəki gənclərin də bizə qoşulmaq istəyini görərək Azərbaycanda da təmsilçiliyimizin olmasını qərar verdim. Hazırda bizə qoşulan bir qrup azarkeşlə müzakirələrimiz davam edir. İlk iştirak edəcəyimiz matçın Belçika səfəri olacağını planlaşdırmışdıq. Lakin saydığım çoxsaylı istəklərdən dolayı açılışı Azərbaycan - İsveç matçıyla edəcəyik. Bu səbəbdən önümüzdəki həftə Bakıya səfər edəcəyəm və təmsilçilik üçün danışıqlar aparacağam. Sonrasında Azərbaycandakı təmsilçiyimiz üçün əlaqələndirici təyin olunacaq və ev matçlarında yerli azarkeşlər də “Göyqurdlar”a qoşula biləcəklər. Yalnız milli komandanın oyunlarında iştirak etməyi düşünürük. Çünki klublarımızın artıq digər azarkeş qruplarının dəstəyinə ehtiyaclarının olmadığını düşünürəm. Biz “Sektor 11” olaraq 10-11 il öncə bütün avrokubok oyunlarında iştirak etməyə çalışırdıq ki, klublarımız dəstəksiz qalmasınlar. Bildiyiniz kimi, o illərdə klubların azarkeş qrupları yeni-yeni formalaşmağa, möhkəmlənməyə başlayırdı. Bəzi klublarımızın heç azarkeş qrupu belə mövcud deyildi. Ancaq artıq buna ehtiyac olmadığı fikrindəyəm. Hazırda “Neftçi”nin, “Qarabağ”ın və digər klubların çox güclü, müasir azarkeş qrupları var. Onlar öz klublarını layiqincə dəstəkləmək gücündədilər. Bu səbəbdən biz, sadəcə, milli komandanın oyunlarında iştirak etməyi planlayırıq. Ehtiyac və tələb olduğu şəkildə, təbii ki, klublarımızın da avrokubok matçlarına gedib dəstəyimizi əsirgəmərik. Nəticə olaraq, qrupumuz millətçi və bayrağını sevən gənclərdən ibarətdi. Bundan başqa, bir daha qeyd edim ki, azarkeş qrupu olmaqla yanaşı, Avropada biz millətçi gəncləri özündə birləşdirən dərnək kimi də fəaliyyət göstərəcəyik”.

“Ölkəsini və bayrağını sevən hər gənc qrupumuza qatıla bilər. Üzvlük üçün qeydiyyatlarımız İsveçlə matç ərəfəsində başlayacaq. Rəsmi səhifəmizdə elan edəcəyimiz üzvlük anketini dolduranlar bazamıza düşəcəklər. Azad fəaliyyət göstərəcəyimiz üçün rəmzi üzvlük haqq da müəyyənləşəcək. Çünki hazırda bizim federasiyadan biletdən başqa bir istəyimiz olmayıb və özümüz özümüzü maliyyələşdirəcəyik. Bunun üçün də Avropadakı azarkeş qruplarının fəaliyyətini nümunə götürərək həm üzvlükhaqqından, həm də atribut satışlarından maliyyələşməni həll etməyi planlayıram. Yeni şərflərimiz sifariş olunub və İsveç matçına qədər hazır olacaq. Qış üçün yağış gödəkçələri və papaq da sifariş edəcəyik. Bunu da unutmadan qeyd edim ki, biz tamaşaçı yox, 90 dəqiqə durmadan dəstək verən azarkeş istəyirik. Millimizin zəif nəticə göstərdiyi və həmişə qalib gəlmədiyini bilə-bilə stadiona gedib üçrəngli bayrağımız üçün dəstək verənləri aramızda görmək istəyirik. Tamaşaçı tipli azarkeşləri aramızda gördüyümüz an onsuz da onların üzvlüyünü ləğv edəcəyik. Bu o demək deyil ki, üst-üstə məğlub olsalar belə, etirazımızı bildirməyəcəyik. Təbii ki, verdiyimiz dəstəyin də qarşılığını meydançada futbolçularımızdan görmək istəyərik”.

“Mən həmişə təhqirə qarşı olmuşam. Təbii, ən azı ictimai yerdə özünü yaxşı aparmaq lazımdı. Çünki biz xuliqan və aqressiv tipli qrup deyilik. Hər kəsin fikirləri fərqli ola bilər, yalnız mənim məqsədim tribunamıza xanımların da qoşulmasıdı. Bu səbəbdən çalışacağıq ki, tribunamızda ən azı təhqir və dava-dalaş olmasın. Fikrimcə, “Ultras” mentallığına malik azarkeş qrupu yaratmaq milli komandalar üçün uyğun deyil”.