"Bizim azarkeş sarıdan problemimiz yoxdu. Milli komandamız kimlə qarşılaşır-qarşılaşsın, bütün vətənpərvər və bayrağını sevən “qurdlar” həmişə komandamızın yanında olacaq. Bildiyiniz kimi, “Göyqurdlar” sadə bir azarkeş birliyindən əlavə Avropada da bayrağını sevən gəncləri özündə birləşdirən dərnək kimi də fəaliyyət göstərəcək. Polşa hökumətinə təqdim etmək üçün bütün lazımi sənədləri toplayıram, tezliklə rəsmi şəkildə müraciət edəcəyik. Matçlara gəlincə onu deyə bilərəm ki, biz bəzi azarkeşlərdən fərqli oyuna baxmağa və rəqibin məşhurluğuna görə gəlmirik. Rəqibin Almaniya və ya Monqolustan olmasından asılı olmayaraq, daim doğma 11-ci sektorumuzda yerimizi alaraq milliyə sona kimi dəstək verəcəyik. Matçla bağlı maraqlı planlarımız var. Xoreoqrafiya etməyi düşünürük, bunu ya Monqolustan ya da Bolqarıstan ilə matçda edəcəyik. Oyunlar arasında zaman kəsiyi yaxın olduğundan ikisində də xoreoqrafiya etmək həm maliyyə, həm də vaxt baxımından çətin olar. AFFA üzvlərimiz üçün bilet ayırıb, biletləri də biz yalnız üzvlük qeydiyyatından keçən həqiqi üzvlərimizə siyahı üzrə verəcəyik. Hədəfimiz İsveç matçında olduğu kimi, yenə 11-ci sektoru tam doldurmaqdı. Hazırda 600 üzvümüz oyuna gələcəyini bizə bildirib. Bu say matç gününə qədər gündəlik artmağa davam edir".