"Verilən dəstəkdən razı qaldığımı desəm, yalan olar. Çünki daha da yaxşısını etmək olardı. Mən radikal biriyəm, ona görə daim düzə düz, səhvə səhv yanaşmağı sevirəm. Azarkeş sayımız 250-yə yaxın idi. Bizimlə birgə matça gələcəyini bəyan edib, səbəbsiz yerə gəlməyənlərin üzvlüyünü ləğv etdik. Bizə yalnız bayrağını sevən və 90 dəqiqə dəstək verən azarkeşlər lazımdı. Sevinirəm ki, hazırda bu yoxlama oyunları keçirilir, bunlar həm də bizim qrup üçün sınaqdı. Bildiyiniz kimi, biz “Sector 11” olaraq 2010-dan fəaliyyətdəydik, köhnə üzvlərimiz artıq mən daxil 35 yaşa yaxınlaşmışıq. Biz çalışırıq ki, yeni və gənc azarkeşləri özümüzə qoşaq, onlara tribunanı sevdirək və tribunanı onlara öyrədək. Belə demək olarsa, biz artıq yaşlı azarkeşlər olaraq, "azarkeş akademiyası" açıb müəllimlik edirik. Hazırkı hədəf milli komandanın payızda başlayacaq Millətlər Liqası matçlarına kimi qrupumuzun onurğa sütununu formalaşdırmaq, bütün şüarlarımızı yeni gələnlərə də öyrətməkdi. Ona görə də bu hazırlıq matçları həm də bizə yeni qoşulanlar üçün bir məşq kimidi. Oyunların çox olması bizə də sərf edir ki, yeni azarkeşləri vacib matçlara qədər hazırlamaq şansımız var".