"Hazırda 500-ə yaxın üzvümüz oyuna gəlmək üçün müraciət edib. Ancaq həmişəki kimi son gün daha çox olur və müraciətlər durmadan artmaqdadı. Düşünürük ki, bu gün Monqolustanla oyundakından daha çox azarkeş komandamızı dəstəkləyəcək. Rəqibin gücü və tarixi hamıya bəllidi. Rəqibin ciddi və futbol ənənələrinə də sahib olduğunu nəzərə alarsaq tribunalarda bu dəfə daha çox azarkeşin olacağını deyə bilərik. Balkan ölkələrinin təmsilçiləri daim təhlükəli və ciddi rəqib sayılırlar. İnşallah, Millətlər Liqasına kimi tribunalardakı azarkeş sayını artırmağı hədəfləmişik. Bu yoldaşlıq görüşləri həm də bizə yeni qoşulan azarkeşlər üçün də bir hazırlıq və məşqdi. “Göyqurdlar” olaraq, qarşımıza qoyduğumuz əsas məqsəd azarkeşlərin komandamıza olan inamını və münasibətini yenidən bərpa etmək, onları tribunaya qaytarmaqdı. Çünki milli komanda klub deyil ki, bundan küsülsün. Nəticələrin ürəkaçan olmaması da azarkeşləri stadiondan uzaq salıb. Hardasa bunu da başa düşmək olar. Ancaq hamı bilməlidi ki, üzərində Azərbaycan bayrağını daşıyan və ölkəmizi təmsil edən komandadan üz çevirmək olmaz. Kapitanımızla və digər futbolçularımızla da görüşümüz oldu. Onlar da sevinirlər ki, arxalarında duran, bizim kimi bayrağını sevən vətənpərvər azarkeşlər var. İnşallah, hamımız əlimizi daşın altına qoyaraq komandamıza itən inamı yenidən bərpa edərək futbolsevərləri tribunalara döndərəcəyik".