Kubokun final matçı ilə Rusiyada futbol mövsümünə yekun vuruldu.

"Football-plus.az" xəbər verir ki, bu dəfə “Lujniki”də “Rostov” ilə ÇSKA üz-üzə gəldi. “Rostov” region yolu, ÇSKA isə premyer-liqa yolu ilə finala yüksəlmişdi.

60 minə yaxın azarkeşin izlədiyi qarşılaşma maraqlı alınsa da, 90 dəqiqə ərzində qapılara qol vurulmadı. Hərçənd oyunun əvvəllərində Oblyakov baxımlı qol vursa da, təxminən 6 dəqiqə davam edən VAR incələməsinin ardından ofsayd qeydə alındı.

“Hərbçilər” üstün təsir bağışlasalar da, favorit statusunu doğrulda bilmədilər. Kubokda əlavə vaxt olmadığından tərəflər birbaşa penalti seriyasına keçdi. Burda isə bəxt Marko Nikoliçin komandasının üzünə güldü. “Rostov”un heyətində Bayramyanın zərbəsindən sonra top dirəyə tuiş gəldisə, Sutorminin zərbəsini təcrübəli Akinfeyev dəf etdi.

Sonda Qayiç həlledici zərbəni dəqiq yerinə yetirərək komandasına titul qazandırdı. Beləliklə, “hərbçilər” ölkə kubokunu son 3 ildə 2-ci, müstəqillik dönəmində isə 9-cu dəfə qazanmaqla bu göstəricidə rekordun sahibi olan “Lokomotiv”ə çatdılar. Bu 9 zəfərdən 8-də Akinfeyev də heyətdə olub. O, İqnaşeviç, Berezutski qardaşları və Elver Rahimiçi geridə qoyaraq bu titulu ən çox qazanan futbolçuya çevrildi. Ən əsası 39 yaşlı Akinfeyev karyerasında 22-ci titulunu qazanaraq İqnaşeviçi (21) geridə qoydu və müstəqil Rusiya futbolu tarixinin ən titullu oyunçusuna çevrildi!

Premyer-liqanı 3-cü pillədə başa vuran ÇSKA bu təqvim ilinin ilk yarısını çox yüksək səviyyədə keçirdi. Komanda 2025-ci ildə keçirdiyi 17 rəsmi oyunun yalnız birində - kubokda “Zenit”də məğlub oldu (10 qələbə, 6 heç-heçə). Nikoliç də adını Rusiya futbolu tarixinə yazdırmağa müvəffəq oldu. Daha öncə bu titulu “Lokomotiv”lə qazanan serbiyalı mütəxəssis Rusiya kubokunu iki fərqli klubla qazanan ilk məşqçi oldu!

Ümumilikdə ÇSKA tarixinin 36-cı titulunu qazandı və bu göstəricidə Rusiya futbolunda rekordçu olan “Spartak”dan cəmi iki titul geridədi. Onu da bildirək ki, superkubok uğrunda oyunda ÇSKA ilə premyer-liqanın yeni çempionu “Krasnodar” qarşılaşacaq.

final
Rostov – ÇSKA 0:0, p. - 3:4
ÇSKA: Akinfeyev, Qayiç, Diveyev, Roşa, Moyzes, Kislyak, Bistroviç (Fayzullayev, 73), Oblyakov, Pyaniç, Koyta (Musayev, 67), Qurariapa (Qlebov, 87).