İyunun 3-də Rusiya premyer-liqasında mövsümə yekun vuruldu.

"Football-plus.az" xəbər verir ki, son turda əsas diqqət gümüş medallar və elitada qalmaq uğrunda mübarizəyə yönəlmişdi. ÇSKA “Rostov”la oyunda gözlənilmədən asan qələbə qazanaraq artıq ilk yarıda bütün suallara aydınlıq gətirdi. Heç də zəif olmayan rəqibə ilk 33 dəqiqəyə 4 qol vuran “hərbçilər” 2-ci pilləni əldən vermədilər. Bu, komandanın 2017/18-dən bəri ən yaxşı nəticəsi oldu. Mövsümün sonluğunu çox zəif keçirən “Rostov” medalçılar sırasına düşə bilmədi. “Spartak” üçün Samara səfəri uğursuz alındı. Çox güman, komanda paralel keçən oyunda ÇSKA-nın qolları sıraladığını görərək həvəsdən düşdü. Çünki artıq qalib gələcəyi təqdirdə də “Spartak” 3-cü pillədən yuxarı qalxa bilməyəcəkdi. Üstəlik “Krılya Sovetov” üçün də oyun mühüm əhəmiyyət daşıyırdı. Samaralılar bəlkə də mövsümün ən vacib qələbəsini qazanaraq “Spartak”a qarşı 7 oyunluq məğlubiyyət seriyasına son qoydular. Komanda 12-ci pilləyə yüksələrək pley-offda oynamaqdan qurtuldu. Bu matçda Promesin penaltidən yararlana bilmədiyini də qeyd edək. “Fakel”in Sankt-Peterburqdan əliboş dönməsi də “Krılya Sovetov”un işinə yaradı. Çünki tura xilaskar 12-ci pillədə məhz voronejlilər başlamışdılar. Motivasiyasız “Zenit” minimal hesabla qalib gələrək 3 oyunluq heç-heçə seriyasına son qoydu. Sergey Semak piterlilərin başında rəsmi matçlarda 125-ci qələbəsini qazanaraq Pavel Sadırinə məxsus klub rekordunu təkrarladı. Amma Sadırin 125 qələbəni 262 oyuna qazanmışdısa, Semak 208 oyuna qazandı.

Qeyd edək ki, gələn mövsüm elitada çıxış etmək uğrunda “Fakel” “Yenisey” ilə, “Nijni Novqorod” isə “Rodina” ilə pley-offda qarşılaşacaq. Qış fasiləsindən sonra fırtına kimi əsən “Lokomotiv” mövsümü qələbə, “Dinamo” isə üzücü məğlubiyyətlə başa vurdu. Maraqlıdı ki, 17-ci turdan sonra, yəni qış fasiləsindən əvvəl 4-cü pillədəki “Dinamo” ilə 14-cü pillədəki “Lokomotiv” arasında xal fərqi 16-ya bərabər idi. Amma sonda “Loko”mövsümü bu rəqibdən daha yuxarı pillədə tamamladı!

30-cu tur
Zenit – Fakel 1:0
Yeroxin, 82.
Zenit: Vasyutin, Karavayev (Adamov, 57), Çistyakov, Alip, Kruqovoy, Kuzyaev, Barrios, Mantuan (Saus, 90), Yeroxin, Mostovoy (Sutormin, 56), Sergeyev (Baranovski, 82).
ÇSKA – Rostov 4:1
Medina, 9. Çalov, 16-p.; 33. Roşa, 25 – Çernov, 78.
ÇSKA: Akinfeyev, Nababkin (Qayiç, 86), Diveyev, Roşa, Moyzes, Zaynutdinov (Şennikov, 75), Zdelar, Kuçayev (Mendes, 46), Oblyakov, Medina (Karraskal, 63), Çalov (Zabolotnı, 62).
Krılya Sovetov – Spartak 1:0
Qarre, 53.
Spartak: Maksimenko, Denisov (Tavareş, 46), Litvinov, Çernov, Xluseviç, Zobnin, Martins, Prutsev (Mozes, 60), Zinkovski, Promes, İqnatov (Balde, 60).
Lokomotiv – Torpedo 3:1
Tiknizyan, 50. Pinyaev, 57. İzidor, 73 – Stefanoviç, 65.
Lokomotiv: Lantratov, Nenaxov (Smolnikov, 83), Kuzmiçev, Mitay, Tiknizyan, Barinov, Karpukas, Qluşenkov (Rakov, 61), Mirançuk (Jemaletdinov, 62), Pinyaev (İzidor, 62), Dzyuba.
Axmat – Krasnodar 2:2
Kamilov, 70. Oleynikov, 78 – Kordoba, 66. Olusequn, 90+1.
Orenburq – Dinamo 3:0
Mansilya, 6. Vorobyov, 40. Vera, 75.
Ural – Soçi 1:0
Yeqoriçev, 89.
Nijni Novqorod – Ximki 2:0
Stotski, 34. Qotsyuk, 83.

Yekun cədvəl
1. Zenit 30 21 7 2 74-20 70
2. ÇSKA 30 17 7 6 56-27 58
3. Spartak 30 15 9 6 60-38 54
4. Rostov 30 15 8 7 48-44 53
5. Axmat 30 15 5 10 51-39 50
6. Krasnodar 30 13 9 8 62-46 48
7. Orenburq 30 14 4 12 58-55 46
8. Lokomotiv 30 13 6 11 54-46 45
9. Dinamo 30 13 6 11 49-45 45
10. Soçi 30 11 5 14 37-54 38
11. Ural 30 10 6 14 33-45 36
12. Krılya Sovetov 30 8 8 14 32-45 32
13. Nijni Novqorod 30 8 6 16 33-50 30
14. Fakel 30 6 12 12 36-48 30
15. Ximki 30 4 6 20 25-67 18
16. Torpedo 30 3 4 23 22-61 13
Bombardirlər: Malkom (Zenit) – 23, Promes (Spartak) – 20, Çalov (ÇSKA) – 19.