Bu yay “Qarabağ”ı tərk edəcək ilk futbolçunun kimliyi artıq şübhə doğurmur. Bütün əlamətlər onu deməyə əsas verir ki, Yassin Benzya növbət mövsümə ağdamlıların heyətində başlamayacaq.

2023-cü ilin yanvarında “Qarabağ”a “Dijon”dan azad agent kimi transfer olunan əlcəzairli yarımmüdafiəçi bu klubu da eyni statusla tərk edir. Ədalət naminə deyək ki, Benzyanın son 2,5 ildəki uğurlarla müəyyən payı olub. 30 yaşlı yarımmüdafiəçi “Qarabağ” formasında keçirdiyi 104 oyunda 28 qol vurub, 25 məhsuldar ötürmə verib, yəni 53 qolda bilavasitə iştirak edib. Məhz Azərbaycanda idman formasını yaxşılaşdırıb, yenidən Əlcəzair yığmasına dəvət olunmağa başlayıb.

Əlbəttə, ən yaxşı nağılların da bir sonu olur. Yassinin hazırda hansı klubla anlaşdığı bəlli olmasa da, bu, sadəcə, zaman məsələsidi. Bəs o, niyə ünvanına komplimetlər dediyi “Qarabağ”la anlaşa bilmədi. Bizə elə gəlir ki, burda əsas amil Benzyanın yaşına uyğun olmayan maliyyə tələbidi. İlk növbədə o məqamı vurğulayaq ki, sentyabrın 8-də 31 yaşını tamamlayacaq yarımmüdafiəçinin müqavilə müddəti iyunun 30-da bitir.

Deməli, artıq sərbəst oyunçudu, istənilən klubla, eləcə də “Qarabağ”la yenidən müqavilə imzalaya bilər. Aydındı ki, bir neçə klubla danışıq aparır. Əldə yüzdəyüz real təklif olmasa da, gah Səudiyyə Ərəbistanı və Qətər klublarının, gah da Tunis çempionu “Esperans”ın adı çəkilir. Onun “Qarabağ”la müqaviləsinin məbləği yalnız son ildə 400 min dollar olub, indi istədiyi məbləğ isə təxminən iki dəfə çoxdu.

Klubla futbolçu arasındakı son ciddi söhbət fevralda olub, əlcəzairli yarımmüdafiəçi ağdamlıların son müqavilədəki məbləği 50 faiz artırmaq təklifinə razı olmayıb. Məhz həmin vaxt “Qarabağ” düşünüb ki, anlaşmaq alınmırsa, müqavilə müddətinin bitməsini, yəni mövsümün sonunu gözləsin, lazım gəlsə, yenidən danışıqlar masası arxasına keçsin. Göründüyü kimi, tərəflərin mövqeyində yaxınlaşma olmadı, həm klub, həm də futbolçu dediyinin üzərində qalanda isə ayrılıq qaçılmazdı.

Bir sözlə, Olavio Juninyonun ardından daha bir aparıcı futbolçu, etiraf etmək lazımdı ki, yetərincə yaxşı oyun göstərən Benzya da “Qarabağ”dan ayrılır. Bəlkə də əlcəzairli futbolçu bunun ağdamlıların heyətində son mövsümü olduğunu anladığından çox aqressiv idi. Biz onun aqressivliyi “Araz-Naxçıvan”la məlum qalmaqallı oyunda da, “Sabah”la kubokun finalında da gördük. Hətta Yassin mayın 31-də keçirilən oyundan sonrakı mükafatlandırma mərasimində AFFA prezidenti Rövşən Nəcəfin boynuna medal taxmaq istəyini geri çevirdi, medalı əlinə götürərək getdi.

O gedən getdi! Əlvida, Benzya!

ORXAN