Qış "transfer pəncərəsi" dövründə Juninyonu "Flamenqo"ya buraxan "Qarabağ" daha bir futbolçu ilə yolları ayıra bilər.

"Football-plus.az" xəbər verir ki, bu barədə yerli və xarici mətbuatda, eləcə də sosial şəbəkələrdə məlumat yayılıb.
İddialara inansaq, "köhlən atlar"dan ayrılacaq növbəti isim Yassin Benzyadı. Belə ki, o, karyerasını Qətərdə davam etdirməyə yaxındı. Futbolçunun xidmətində maraqlı olan komandanın adı da bəllidi. Söhbət "Umm Salal"dan gedir. Kuluarlarda gəzən söz-söhbətə əsasən deyə bilərik ki, klub artıq əlcəzairli oyunçuyla danışıqlara başlasa da, bu yöndə "Qarabağ"a müraciət etməyib. Ona görə ki, funksionerlərin məqsədi əvvəlcə futbolçunun razılığını almaqdı.

Bəs, hadisələrin axarı necə cərəyan edə bilər? Bəllidi ki, Ağdam təmsilçisi Juninyonun komandadan ayrılması nəticəsində ön xətdə ciddi güc itirib. "Köhlən atlar"ın heyəti gücləndirmək istiqamətində heç nə edə bilmədiyini nəzərə alsaq, Benzyanın gedişi işləri bir qədər də korlaya bilər.

Hər halda, futbolçunun "Qarabağ"la müqaviləsinin müddəti bu ilin yayında başa çatacaq. Ağdamlılar Benzya sayəsində pul qazanmaq istəyirsə, "Umm Salal"ın mümkün təklifini qiymətləndirərkən daha diqqətli olmalıdı.

Xatırladaq ki, Yassin 2023-cü ilin yayından "köhlən atlar"ın şərəfini qoruyur. O, bu müddət ərzində bütün turnirlərdə meydana çıxdığı 84 matçda 22 qol, 23 məhsuldar ötürmə ilə yadda qalıb.

KƏNAN BAHADIR