Liqa-1-in İntizam Komissiyası belə desək, homofobiyaya dəstək aksiyasında iştirak etmək istəməyən futbolçuları cəzalandırıb.

Mayın 17-də Liqa-1 Beynəlxalq Homofobiyaya Qarşı Mübarizə Gününə həsr olunmuş aksiya keçirmişdi. Bu üzdən 34-cü tur çərçivəsində futbolçular meydana üzərində LQBT bayrağı olan formalarla çıxmışdılar. Ancaq ''Lion''un serbiyalı futbolçusu Nemanya Matiç, eləcə də ''Havr''ın misirli forvardı Ahmed Hassanın geydiyi formanın üzərindəki LQBT bayrağının ağ rəngdə yapışqanlı lent ilə örtüldüyü görünmüşdü.

Bundan başqa ''Lans''ın müdafiəçisi Jonatan Qradi ''Monako'' ilə oyunun fasiləsində paltardəyişmə otağına yollanarkən homofobiya ilə bağlı təhqiramiz ifadələr işlətmişdi. Bu olayları araşdıran İntizam Komitəsi Matiç ilə Hassana 4, Qradiyə 1 oyunluq cəza verib. Ancaq serbiyalı və misirli futbolçular yalnız 2 oyun buraxacaqlar. Daha 2 oyunluq cəza isə şərti xarakter daşıyır. Onlar 6 ay ərzində homofobiya mövzulu tədbirlərdə iştirak etməli olacaqlar. Hər halda futbolçularla İntizam Komissiyası arasında bununla bağlı razılıq əldə olunub.

Qeyd edək ki, ''Nant''ın misirli forvardı Mustafa Məhəməd aksiyanın keçirildiyi turda daha da radikal mövqe tutmuşdu. O, üzərində LQBT bayrağı olan formanı geyməkdən imtina etdiyi üçün həmin turda meydana çıxmadı.

Ümumiyyətlə, demək olar, hər il Fransada bu mövzuda müxtəlif qalmaqallar yaşanır. Ötən il də ''Monako''lu Məhəməd Kamara bu aksiyaya dəstək vermədiyi üçün cəzalanmışdı.