Yeni mövsüm öncəsi ''Beşiktaş''ın heyətində yaşanacaq dəyişikliklər maraqla gözlənildiyi bir vaxtda məşqçilər korpusunda da dəyişiklik baş verəcəyi məlum olub.

Geridə qoyduğumuz mövsümdə Covanni van Bronxorstun ayrılmasından sonra Ole Qunnar Sulşer gələnə qədər baş məşqçi səlahiyyətlərini Sərdar Topraktəpə icra etmişdi. Norveçli mütəxəssis gəldikdən sonra isə Topraktəpə onun əsas köməkçisinə çevrilmişdi. Amma 48 yaşlı türkiyəli mütəxəssisin yeni mövsümdə fərqli vəzifədə çalışacağı məlum olub.

''Sabah'' nəşrinin xəbərinə görə Topraktəpə əvvəlki illərdə olduğu kimi yenə akademiyada işləyəcək. Sulşerin yeni köməkçisi isə Vəli Kavlak olacaq. ''Beşiktaş'' fanatları Kavlakı gözəl tanıyır. O, futbolçu kimi Avstriya yığmasının, eləcə də 2011-18-ci illərdə ''ağ-qaralar''ın şərəfini qoruyub. Daha sonra çiynindən zədə alaraq uzun müddətə sıradan çıxmış və yekunda karyerasını bitirməli olmuşdu.

Məşqçilik karyerasına 2023-ün yanvarında Vyana ''Rapid''ində başlayaraq U-15 və U16 komandalarında çalışıb. 2024-ün iyulundan bu yana isə Kavlak ''Beşiktaş''ın U-19 komandasını çalışdırırdı.