Popoviç insultdan sonra işə davam edə bilmədi
“San-Antonio”nun əfsanəvi məşqçisi Qreqq Popoviç sağlamlıq durumu ilə bağlı problem üzündən karyerasını başa vurub.
"Football-plus.az" xəbər verir ki, ötən ilin noyabrında insult keçirən 76 yaşlı mütəxəssis həmin vaxtdan bəri komandasının MBA-dakı oyunlarında görünməyib. Bundan sonra klubda başqa vəzifədə çalışacaq amerikalı postunu liqada qələbə sayına görə rekordçu statusu ilə tərk edir.
Popoviç 29 ildən sonra “San-Antonio”dan ayrılır – o, bu müddətdə komandanı 5 dəfə çempion edib, “Spers”lə 1422 qələbə qazanıb. MBA-nın Şöhrət zalında yeri haqq edən təcrübəli mütəxəssis son mövsümdə, demək olar ki, ehtiyat oyunçular skamyasından basketbolçularına göstəriş verə bilmədi – cəmi 5 oyunda iş başında oldu, qalan 77 oyunda isə köməkçisi Mitç Conson məsuliyyəti boynuna götürdü. 76 yaşlı mütəxəssis mövsümboyu sağlamlıq problemlərinə görə əziyyət çəkdi.
Popoviç baş məşqçi postunu tərk etsə də, “San-Antonio”nun klub strukturunda qalır. O, bundan sonra klub prezidenti kimi çalışacaq. Yeni vəzifəsinin icrasına növbəti mövsümdən başlayacaq. “Associated Press” onun aşağıdakı sözlərinə yer verib:
“Oyuna sevgim və ehtirasım qalsa da, baş məşqçi postundan getməyin vaxtının yetişdiyini düşündüm. “San-Antonio”nun baş məşqçisi kimi xidmət göstərməyimə yardım edən möhtəşəm oyunçulara, həmkarlarıma, personala və azarkeşlərə sonsuz minnətdarlığımı çatdırmaq istəyirəm. Mənim üçün çox vacib olan klubu və şəhəri bundan sonra da dəstəkləmək imkanı qazandığıma görə çox şadam”.
Bir daha xatırladaq ki, təcrübəli mütəxəssis ötən il noyabrın 2-də kiçik insult keçirib. Bu hadisə “Minnesota” ilə çempionat oyunundan əvvəl baş verib. Popoviç dekabrda başına gələnləri belə anlatmışdı:
“Mən və ailəm üçün gözlənilməz altı həftəni arxada qoyduq. Bu müddətdə gördüyüm dəstəyin səviyyəsi məni şoka saldı. Hər birinizə ayrıca təşəkkür etmək istəsəm də, indiki mərhələdə, sadəcə, özümün və ailəmin sizə əbədi minnətdar olduğumuzu deməyə imkanım var. Möhtəşəm klubumuza, yaxınlarımıza və dostlarımıza təşəkkür edirəm”.
Popoviç apreldə bir daha xəstəxanaya düşdü: restoranda qəfil huşunu itirdi. Ətrafdakılar dərhal ünlü məşqçini xərəkdə təcili yardım maşınına çatdırdılar. Qreqq artıq maşında özünə gəlmişdi, danışırdı. Bir neçə gündən sonra xəstəxanadan buraxılsa da, artıq fəal məşqçi karyerasından söhbət gedə bilməzdi. Popoviçin köməkçisi Mitç Consonun ümidinə qalan “San-Antonio” Şərq konfransında müntəzəm çempionatda 13-cü yeri tutmaqla pley-offa vəsiqə qazana bilmədi. Qreqq “Spers”i 1996-cı ildən bəri çalışdırırdı, bu müddətdə iki dəfə klubla paralel ABŞ yığmasının da “sükanı arxasında” olmuşdu.
Onun üç dəfə MBA-da ilin məşqçisi sayıldığını da xatırladaq.
Digər xəbərlər
