“San-Antonio”nun insult keçirən baş məşqçisi Qreqq Popoviç postunu tərk edib.

76 yaşlı mütəxəssis bundan sonra klub prezidenti vəzifəsini daşıyacaq. Popoviç ötən ilin noyabrında insult keçirib, 2024/25 mövsümündə onun səlahiyyətlərini Mitç Conson yerinə yetirib.
“San-Antonio” 1996-cı ildən “sükan arxasında” olan Popoviçin dövründə 5 dəfə MBA çempionu olub, adı çəkilən mütəxəssis 2003 2012 və 2014-cü illərdə “ilin məşqçisi” mükafatını qazanıb.

“San-Antonio”nun bu məsələ ilə bağlı yaydığı bəyanatda deyilir: “Qreqq Popoviçin “San-Antonio” və basketbol üçün töhfəsini dəyərləndirmək və anlamaq çətindi. Onun mükafatları və adları çoxlu adama göstərdiyi təsir haqda tam təsəvvür yaratmır. Pop unikal adam, lider və məşqçidi. Bütün ailəmiz, bütün dünyadan olan azarkeşlərimiz onun son 29 ildə baş məşqçi kimi gördüyü işə görə minnətdardı”.
Bu arada pley-offun ilk mərhələsi başa çatıb və 1/4 final cütləri müəyyənləşib: “İndiana” – “Klivlend”, “Denver” – “Oklahoma-Siti”, “Nyu-York” – “Boston”, “Minnesota” – “Qolden Steyt”. Dünən “İndiana” – “Klivlend” seriyası başlayıb.

“Qolden Steyt” – “Hyuston” rəqabəti ilə bağlı da maraqlı məqam var. Belə ki, “Qolden Steyt” MBA-nın pley-offunda 5 dəfə bu komandaya rəqib olub və hamısında da qələbə qazanıb – 2015, 2016, 2018, 2019, 2025.

3 may
Qolden Steyt – Hyuston 107:115 (21:25, 27:28, 36:33, 23:29)
Seriyada hesab – 3:3.

4 may
Denver – Klippers 120:101 (21:26, 37:21, 35:19, 27:35)
Seriyada hesab – 4:3.

5 may
Hyuston – Qolden Steyt 89:103 (19:23, 20:28, 23:19, 27:33)
Seriyada hesab – 3:4.
Klivlend – İndiana 112:121 (25:36, 33:28, 32:28, 22:29)
Seriyada hesab – 0:1.