Braziliya çempionatında keçirilən 10-cu turun oyunlarından sonra turnir cədvəlində lider dəyişmədi. Amma “Palmeyras” ilə “Flamenqo” arasındakı xal fərqi minimuma endi. Turun mərkəzi oyunu məhz lider ilə əsas izləyicisi arasında keçirildi.

Son 3 turu maksimum nəticə ilə başa vuran “Palmeyras” “Flamenqo” ilə xal fərqini 4-ə yüksəltmişdi. Abel Ferreyranın komandası üçün fərqi artırmaq fürsəti yaranmışdı. Hər halda “Palmeyras” çempionluq yarışında əsas rəqiblərindən birini evdə sınağa çəkəcəkdi. Amma oyunun san paululular üçün asan keçməyəcəyini də ehtimal etmək olardı.

Meydan sahibləri rəqibini yalnız qapıya zərbələr planında üstələyə bildi – 13:7. Hər iki tərəf qapıya bərabər sayda – 3 zərbə endirdi. “Flamenqo”nun qapıçısı Rossi bütün zərbələri dəf edərkən, onun həmkarı Veverton yalnız bir dəfə seyv edə bildi. Əslində ilk hissə san paululular üçün uğurlu nəticələnə bilərdi. 17-ci dəqiqədə Rossi rəqib oyunçunun qarşısını kobudluqla aldı. Sarı vərəqə ilə cəzalanan argentinalı qapıçı penaltiyə səbəbkar olsa da, səhvini düzəldərək Pikeresin zərbəsinin qarşısını aldı. İkinci hissədə üstünlük gah bu, gah da digər tərəfə keçdi. Amma qol vurmağı yalnız qonaq komanda bacardı. Əvvəlcə De Arraskaeta hesabı açdı. 73-cü dəqiqədə penaltini qola çevirən uruqvaylı yarımmüdafiəçi bu mövsüm A seriyasındakı qollarının sayını 8-ə çatdırdı.

14 dəqiqə sonra Ayrton Lukas rio de janeyroluların növbəti qolunu vurmaqla komandasının qələbəsinə şübhə yeri qoymadı. Beləliklə, Filipe Luisin çalışdırdığı “Flamenqo” lider ilə xal fərqini birə endirdi.

Tura hərəyə 17 xal toplamaqla 3-4-cü yerləri bölüşməklə başlayan hər iki komanda qələbə qazandı. “Kruzeyro” səfərdə “Fortaleza”nın qapısından iki top keçirdi. “Braqantino” isə evdə “Juventude”ni bir qolla məğlub etdi. “Kruzeyro” cədvəldə “Braqantino”nu yenə topların daha yaxşı fərqinə əsasən qabaqlayır.

10-cu tur
Palmeyras - Flamenqo 0:2
De Arraskaeta, 73-p. Ayrton Lukas, 87.

Fortaleza - Kruzeyro 0:2
Kayo Jorje, 34. Lukas Silva, 41.

Braqantino – Juventude 1:0
Con Con, 45+4.

Fluminense - Vasku da Qama 2:1
Veqetti, 42-öz qapısına. Quqa, 87 – Joao Viktor, 25.

San Paulu - Mirassol 0:2
Qabriel, 53. Reynaldo, 89-p.

Atletiko Mineyro - Korintians 0:0

Qremio - Bayya 1:0
Breytveyt, 61-p.

Sport Resife - İnternasyonal 1:1
Kristian Barletta, 7 – Qustavo Prado, 48.

Vitoriya - Santos 0:1
Gilyerme, 18.

1. Palmeyras 10 7 1 2 11-6 22
2. Flamenqo 10 6 3 1 19-4 21
3. Kruzeyro 10 6 2 2 15-7 20
4. Braqantino 10 6 2 2 12-8 20
5. Fluminense 10 5 2 3 13-12 17
6. Seara 9 4 3 2 11-7 15
7. Bayya 10 4 3 3 9-10 15
8. Korintians 10 4 2 4 12-14 14
9. Mirassol 10 3 5 2 16-12 14
10. Atletiko Mineyro 10 3 5 2 10-10 14
11. Botafoqo RJ 9 3 3 3 10-5 12
12. Qremio 10 3 3 4 9-14 12
13. San Paulu 10 2 6 2 8-9 12
14. İnternasyonal 10 2 5 3 12-14 11
15. Vasku da Qama 10 3 1 6 11-13 10
16. Fortaleza 10 2 4 4 10-10 10
17. Vitoriya 10 2 3 5 10-14 9
18. Santos 10 2 2 6 8-11 8
19. Juventude 10 2 2 6 8-22 8
20. Sport Resife 10 0 3 7 5-17 3

Bombardirlər: De Arraskaeta (Flamenqo) - 8, Veqetti (Vasku da Qama) - 7, Kayo Jorje (Kruzeyro) – 6, Reynaldo (Mirassol), Yuri Alberto (Korintians) - 5, Pedro (Flamenqo), Pedro Raul (Seara) - 4.