Braziliya çempionatında avqustun 19-21-i aralığında 20-ci turun oyunları keçirildi.

“Football-plus.az” xəbər verir ki, bununla da A seriyasında mövsümün ikinci dövrəsinə start verildi.
İlk dövrəni lider kimi və əsas izləyicisi “Palmeyras”dan 13 xal öndə başa vuran “Botafoqo” çətin San Paulu səfərinə çıxmışdı. Son turlar “evdə qələbə, səfərdə heç-heçə” prinsipi ilə irəliləyən rio de janeyrolular rəqib meydanında yenə qalib gələ bilmədilər. “San Paulu” çempionatın liderinə bacardığı qədər çətinliklər yarada bildi. Dorival Juniorun çalışdırdığı komanda qonaqları topa sahibolma (60:40 faiz) və qapıya dəqiq zərbələr (4:1) üzrə üstələdi. “Botafoqo”nun 25 yaşlı qapıçısı Perri bütün zərbələri zərərsizləşdirdi. Beləliklə, lider baş məşqçi vəzifəsinə iyulda keçən Bruno Lajenin rəhbərliyi altında A seriyasında keçirdiyi 7-ci matçda da uduzmadı (4 qələbə, 3 heç-heçə). Amma son 5 oyunda rəqibi ilə 3-cü dəfə “sülh bağlayan “ağ-qaralar”ın əsas izləyicisi ilə xal fərqi 11-ə endi.
İkinci dövrəyə liderin əsas izləyicisi kimi başlayan “Palmeyras”ın Kuyabada büdrəməyə haqqı yox idi. Bu mövsüm heç cür sabit oyun sərgiləyə bilməyən son çempiona “Botafoqo” ilə xal fərqini azatmaq üçün yalnız qələbə lazım idi. Abel Ferreyranın komandası “Kuyaba” üzərində oyun planında aşkar üstünlük əldə edə bilməsə də, istəyinə çatdı. Rafael Veyqa ilə Riosun qolları “Palmeyras”ın inamlı qələbəsini təmin etdi. Çempion son 5 oyunda 4-cü qələbə ilə azarkeşlərinin titulu qoruya biləcəyinə ümidlərini bir qədər artırdı.

Tura 3-cü yerdə başlayan “Qremio”nun Santosa səfəri uğursuz alındı. Halbuki Renato Qauşunun komandası fasilədən dərhal sonra hesabı açmışdı. Lakin ev sahibləri buraxılan qolun əvəzini iki dəfə verməklə əzmkar qələbə qazandılar. Bu nəticə ilk dövrəni 17-ci yerdə başa vuran “Santos”a çox lazım idi. Doğrudu, Pelenin keçmiş komandasının mövqeyi dəyişmədi, “Qremio” isə ikipilləlik geriləmə ilə 5-ci yerə düşdü.

Ona görə ki, “Flamenqo” turu maksimum xalla başa vurdu. “Koritiba”nın qonağı olan Xorxe Sampaolinin komandası hesabına 3 xalı çətinliklə yazdı. Qarşılıqlı hücumlar şəraitində keçən matçın son saniyələrində Jersonun vurduğu qol rio de janeyrolulara qələbə qazandırdı.

Birinci dövrəni 5-ci pillədə başa vuran “Braqantino” Salvadorda darmadağına məruz qaldı. “Bayya”ya 0:4 hesablı məğlubiyyət “öküzlər”i 7-ci yerə saldı. “Fluminense” isə “Amerika Mineyro” üzərində 3:1 hesablı qələbə ilə bu pillədən 4-cü yerə yüksəldi. Fernando Dinizin komandasının bu mövsüm evdə keçirdiyi 11-ci oyunda uduzmadığını (8 qələbə, 3 heç-heçə) da qeyd edək. “Flu”dan başqa belə göstəriciyə “Botafoqo”nun (10 oyuna 10 qələbə) malik olduğunu da bildirək.

20-ci tur
San Paulu - Botafoqo RJ 0:0
Kuyaba - Palmeyras 0:2
Rafael Veyqa, 31. Rios, 66.
Santos - Qremio 2:1
Markos Leonardo, 63. Furç, 90 – Kristaldo, 46.
Koritiba - Flamenqo 2:3
Robson, 15-p. Edu, 46 – Qabriel Barboza, 19. De Arraskaeta, 31. Jerson, 90+4.
Bayya - Braqantino 4:0
Rezende, 9. Vitor Uqo, 38. Vinisius Minyotti, 60. Kauli, 84.
Qoyas - Atletiko Paranaense 1:1
Alesson, 81 – Vitor Roke, 39.
İnternasyonal - Fortaleza 0:1
Tyaqo Qalyardo, 13-p.
Fluminense - Amerika Mineyro 3:1
Con Kennedi, 58. Kano, 65. Aryas, 89 – Felipe Azevedo, 52.
Kruzeyro - Korintians 1:1
Rafael Elias, 45 – Qustavo Silva, 90+8.
Vasku da Qama - Atletiko Mineyro 1:0
Serjinyo, 5.

1. Botafoqo RJ 20 15 3 2 35-11 48
2. Palmeyras 20 10 7 3 36-17 37
3. Flamenqo 20 10 5 5 34-26 35
4. Fluminense 20 10 4 6 28-20 34
5. Qremio 19 10 3 6 29-25 33
6. Atletiko Paranaense 20 9 5 6 29-23 32
7. Braqantino 20 8 8 4 27-21 32
8. Fortaleza 20 8 5 7 22-19 29
9. Kuyaba 20 8 4 8 21-23 28
10. San Paulu 20 7 7 6 24-19 28
11. Atletiko Mineyro 20 7 6 7 22-18 27
12. Kruzeyro 20 6 7 7 20-17 25
13. Korintians 19 6 6 7 21-22 24
14. İnternasyonal 20 6 6 8 17-24 24
15. Qoyas 20 6 5 9 19-28 23
16. Bayya 20 5 6 9 22-25 21
17. Santos 20 5 6 9 21-32 21
18. Vasku da Qama 19 4 4 11 15-29 16
19. Koritiba 20 3 5 12 20-39 14
20. Amerika Mineyro 19 2 4 13 20-44 10
Bombardirlər: Tikinyo Soares (Botafoqo RJ) - 13, Deyverson (Kuyaba), Vitor Roke (Atletiko Paranaense), Markos Leonardo (Santos) - 8, Kano (Fluminense), Rocer Gedeş (Korintians), Halk (Atletiko Mineyro) - 7.