Braziliya çempionatında 33-cü tur “Botafoqo” üçün düşərli alınmadı. Lider iki xal itirdi, əsas izləyiciləri isə qalib gəldilər. Nəticədə “Botafoqo” ilə “Palmeyras” arasındakı xal fərqi 4-ə düşdü.

Əslində lider üçün “Kuyaba” ilə ev oyununun asan keçəcəyini düşünmək olardı. Ona görə ki, qonaq komanda tura A seriyasının ən zəif ikinci iştirakçısı kimi başlamışdı. Lakin 2-ci divizona düşmək istəməyən kuyabalılar güclü rəqibinin hücumları qarşısında sona qədər tab gətirə bildilər. Yeri gələndə kobud oynayan qonaqlar sonda bir xal qazanmağı bacardılar. Evdə sürpriz 2 xal itkisi Artur Jorjenin komandasının mövqeyinə təsir etmədi.

Amma bu da var ki, “Botafoqo” indi əsas izləyicisini 6 xal qabaqlamır. Ona görə ki, “Palmeyras” turu itkisiz başa vurdu. Braziliyanın son çempionunun “Qremio” ilə ev oyununun nəticəsini bir qol müəyyənləşdirdi. Həmin qolu 73-cü dəqiqədə Estevao vurdu. 17 yaşlı hücumçu bu mövsüm qapıya 12-ci dəfə yol tapmaqla bombardirlərin yarışında liderliyi ələ aldı. Liderin büdrəməsindən maksimum yararlanan “Palmeyras” çempionluq yarışında bir qədər ümidləndi. Abel Ferreyranın çalışdırdığı komanda indi liderdən 4 xal geri qalır.

Əvvəlki turda üçoyunluq qələbəsizliyə son qoyan “Fortaleza” ardıcıl ikinci oyunda maksimum nəticəyə nail oldu. Xuan Voyvodanın komandası bu dəfə “Vasku da Qama”nın qapısından üç cavabsız top keçirdi. Fortalezalılar inamlı qələbə ilə çempionluğa iddiasını davam etdirdilər. Onlar finişə 5 tur qalmış “Botafoqo” ilə xal fərqini 7-dən 5-ə endirdilər.

“Flamenqo” isə öz meydanında “Atletiko Mineyro”dan yalnız bir xal ala bildi. Halbuki 37 yaşlı məşhur müdafiəçi David Luis ilk hissədə penaltini qola çevirsəydi, rio de janeyroluların çempionluq ümidləri davam edəcəkdi. Lakin qolsuz “sülh” ölkə nəhəngi ilə lider arasındakı 9 xallıq fərqi qorudu. Bu isə oktyabrda istefaya göndərilən Titenin səlahiyyətlərini müvəqqəti icra edən 39 yaşlı Filipe Luisin çalışdırdığı “Flamenqo”nun çempionluq imkanlarının bir qədər də azaldığına işarədi.

33-cü tur
Botafoqo RJ - Kuyaba 0:0
Palmeyras - Qremio 1:0
Estevao, 73.
Fortaleza - Vasku da Qama 3:0
E.Martines, 13. Breno Lopes, 78. Renato Kayzer, 90+2.
Flamenqo - Atletiko Mineyro 0:0
İnternasyonal - Fluminense 2:0
Borre, 52. Bruno Enrike, 90+5.
San Paulu - Atletiko Paranaense 2:1
Lusiano, 52. Andre Silva, 89 – Julimar, 69.
Vitoriya - Korintians 1:2
Alerrandro, 9 - Yuri Alberto, 24. Depay, 69.
Kruzeyro - Krisiuma 2:1
Kayo Jorqe, 9. Qabriel Veron, 70 – Allano, 82.
Atletiko Qoyaniense – Braqantino 0:0
Juventude - Bayya 2:1
Lukas Barboza, 70. Qabriel Talyari, 79 – Kauli, 2.
19-cu turdan təxirə salınan oyun
Atletiko Paranaense - Atletiko Mineyro 1:0
Koelyo, 28.

1. Botafoqo RJ 33 20 8 5 52-26 68
2. Palmeyras 33 19 7 7 54-27 64
3. Fortaleza 33 18 9 6 47-32 63
4. Flamenqo 33 17 8 8 51-37 59
5. İnternasyonal 33 16 11 6 46-28 59
6. San Paulu 33 17 6 10 47-34 57
7. Kruzeyro 33 13 8 12 38-35 47
8. Bayya 33 13 7 13 43-42 46
9. Vasku da Qama 33 12 7 14 36-49 43
10. Atletiko Mineyro 33 10 12 11 42-47 42
11. Korintians 33 10 11 12 39-41 41
12. Qremio 33 11 6 16 38-42 39
13. Vitoriya 33 11 5 17 38-48 38
14. Atletiko Paranaense 33 10 7 16 35-41 37
15. Fluminense 33 10 7 16 28-36 37
16. Krisiuma 33 9 10 14 39-48 37
17. Juventude 33 9 10 14 40-52 37
18. Braqantino 33 8 12 13 34-40 36
19. Kuyaba 33 6 11 16 25-41 29
20. Atletiko Qoyaniense 33 6 8 19 24-50 26

Bombardirlər: Estevao (Palmeyras) - 12, Pedro (Flamenqo) – 11.