Braziliya çempionatında mövsüm sona yaxınlaşdıqca çempionluq uğrunda mübarizə daha da gərginləşir. 30-cu tur “Botafoqo”nun xal itkisi və liderin əsas izləyicisinin qələbə qazanması ilə daha çox yadda qaldı. Nəticədə liderlə “Palmeyras” arasındakı xal fərqi minimuma endi.

Artur Jorjenin komandasının “Krisiuma” ilə ev oyununda maksimum nəticə əldə edə bilməməsi gözlənilməz oldu. Rio de janeyroluların qələbə şansı yüksək idi, lakin lider çempionluq yarışında ortabab rəqibdən zərbə aldı. Gözlənildiyi kimi, matç “Botafoqo”nun aşkar üstünlüyü şəraitində keçdi. Buna baxmayaraq, ev sahibləri əsas vaxtda qapıya yol tapa bilmədilər. Qapıya 25 zərbə endirən “ağ-qaralar”ın həmlələrindən yalnız 7-si dəqiq alındı. Amma qonaqların qapıçısı Luis Qustavo bu zərbələrdən altısının qarşısını aldı. Matçın əsas vaxtına əlavə edilən dəqiqələr çox maraqlı keçdi. Əvvəlcə Tikinyo Soares ev sahiblərini hesabda önə keçirdi. Az sonra Felipe Vizeu bərabərlik qolunu vurdu. Nəticədə bir xal qazanan “Botafoqo” liderliyini qorudu.
Amma evdə iki xal itirən lider indi əsas izləyicisini yalnız bir xal qabaqlayır. Ona görə ki, “Palmeyras” turu qələbə ilə başa vurdu. Braziliyanın son çempionu “Juventude”ni səfərdə 5:3 hesabıyla məğlub etdi. San paululuların qələbəsində het-trik edən yarımmüdafiəçi Rafael Veyqa böyük rol oynadı. Abel Ferreyranın komandası bu qələbə ilə liderə bir qədər də yaxınlaşdı.

Çempionluğa iddia edən “Fortaleza” yenə büdrədi. Xuan Voyvodanın komandası bu dəfə “Atletiko Mineyro” ilə ev oyununda iki xal itirdi. Halbuki matç “göy-qırmızılar” üçün yaxşı axarda davam edirdi: Marinyo 25-ci dəqiqədə meydan sahiblərini önə keçirdi. Fasilədən dərhal sonra qonaqlar cavab qolunu vurdular. Matçın bundan sonrakı hissəsi fortalezalılar üçün çox çətin keçdi. Ona görə ki, hesabı açan Marinyo 59-cu, müdafiəçi Tinqa isə 83-cü dəqiqədə kobud oyuna görə qırmızı vərəqə ilə cəzalandılar. Voyvodanın komandası meydanda 9 nəfərlə qalmasına baxmayaraq, heç-heçə hesabını sonadək qorumağı bacardı. 3-cü yerdəki mövqeyini qoruyan “Fortaleza” əvvəlki kimi liderdən 5 xal geri qalır.

Əvvəlki iki turda qələbə qazanan “Flamenqo” azarkeşlərini sevindirsə də, derbidə məğlub oldu. Qeyd edək ki, komandanı “Fluminense” ilə matça Filipe Luis çıxardı. 39 yaşlı mütəxəssis qeyri-qənaətbəxş nəticələrə görə istefaya göndərilən Titenin səlahiyyətlərini müvəqqəti icra edəcək. Onun baş məşqçi kimi debütü isə uğursuz alındı. Derbidə 0:2 hesablı məğlubiyyət “qırmızı-qaralar”ın 4-cü pillədəki mövqeyinə təsir etmədi. Ehtiyatda bir təxirə salınan oyunu olan “Flamenqo” liderdən yenə 10 xal geri qalır.

30-cu tur
Botafoqo RJ - Krisiuma 1:1
Tikinyo Soares, 90+1 – Felipe Vizeu, 90+4.
Juventude - Palmeyras 3:5
Danilo Boza, 35. Ronaldo, 49. Edson Karioka, 67 – Estevao, 22. Rafael Veyqa, 44; 50; 90. Rios, 63.
Fortaleza - Atletiko Mineyro 1:1
Marinyo, 25 – Vera, 48.
Flamenqo - Fluminense 0:2
Lima, 50. Aryas, 60.
San Paulu - Vasku da Qama 3:0
Lusiano, 9. Lukas Moura, 46; 67.
İnternasyonal - Qremio 1:0
Borre, 67.
Korintians - Atletiko Paranaense 5:2
Mateus França, 5. Kaka, 18. Depay, 55. Qarro, 66. Yuri Alberto, 78 - Nikao, 30. Erik, 39.
Atletiko Qoyaniense - Kuyaba 0:0
Kruzeyro - Bayya 1:1
Qabriel Veron, 61 – Rodriges, 82.
Vitoriya - Braqantino 1:0
Everaldo, 78.
17-ci turdan təxirə salınan oyun
Fluminense - Atletiko Paranaense 1:0
Kano, 81.

1. Botafoqo RJ 30 18 7 5 48-26 61
2. Palmeyras 30 18 6 6 51-23 60
3. Fortaleza 30 16 8 6 39-30 56
4. Flamenqo 29 15 6 8 45-34 51
5. San Paulu 30 15 5 10 41-32 50
6. İnternasyonal 29 13 10 6 38-26 49
7. Bayya 30 13 7 10 40-34 46
8. Kruzeyro 30 12 8 10 36-30 44
9. Atletiko Mineyro 29 10 11 8 41- 42 41
10. Vasku da Qama 29 10 7 12 32-41 37
11. Fluminense 30 10 6 14 25-30 36
12. Krisiuma 30 9 9 12 37-43 36
13. Qremio 30 10 5 15 33-38 35
14. Braqantino 30 8 10 12 34-39 34
15. Juventude 30 8 10 12 36-44 34
16. Vitoriya 30 9 5 16 33-44 32
17. Korintians 30 7 11 12 34-40 32
18. Atletiko Paranaense 29 8 7 14 29-37 31
19. Kuyaba 29 6 9 14 25-39 27
20. Atletiko Qoyaniense 30 5 7 18 22-47 22

Bombardirlər: Pedro (Flamenqo) - 11, Estevao (Palmeyras), Halk (Atletiko Mineyro) - 10, X.Lopes (Palmeyras), Lusiano (San Paulu), Veqetti (Vasku da Qama) - 9.