Bu mövsümü praktiki olaraq boşa verən və yeni mövsümün planlarını cızmağa başlayan ''Beşiktaş''da Gedson Fernandeş ilə bağlı önəmli bir olay yaşanıb.

Məlum olduğu kimi portuqaliyalı ulduzun haqlarının 50 faizi onun əvvəlki klubuna, yəni ''Benfika''ya məxsusdu. 2022-ci ildə ''ağ-qaralar'' Lissabon nəhənginə 6 milyon avro ödəyərək bu yarımmüdafiəçini transfer etmiş və onun haqlarının yalnız 50 faizini ələ keçirmişdi. Yəni Fernandeşin sonrakı satışından əldə olunacaq pulun 50 faizi ''Benfika''ya çatmalıdı. İstanbul nəhəngi son aylarda bir neçə dəfə ''Benfika'' ilə anlaşmağa və futbolçunun haqlarının hamısını ələ keçirməyə çalışmışdı. Ancaq danışıqlar uğursuz alınmışdı. Türkiyə mətbuatının yazdığına inansaq, bu dəfə ''Beşiktaş'' ''Benfika''ya konkret olaraq 7 milyon avro təklif edib. İstanbul nəhəngi bu məbləği 3 dəfəyə ödəməyi təklif edib. Ancaq Portuqaliya klubu növbəti dəfə bu təklifi yaxına buraxmayaraq onu dərhal geri çevirib.

Əslində ''Benfika''nı anlamaq olar. Çünki bu klub indiki şərtlərdə Fernandeşin satışından daha çox pul əldə edə bilər. Məsələn qışda Rusiyadan Fernandeşə görə ''Beşiktaş''a 25 milyon avroluq təklif gəlmişdi. Həmin vaxt 26 yaşlı oyunçu satılacağı təqdirdə bu məbləğin yarısı ''Benfika''ya çatacaqdı. Amma istanbullular məhz pulun yarısını bölüşmək istəmədiklərinə görə həmin vaxt Fernandeşi satmaqdan imtina etdilər. ''Beşiktaş'' rəsmiləri ''Benfika'' ilə daha az məbləğə anlaşmağın mümkün olacağını düşünürdülər. Amma göründüyü kimi lissabonlular danışıqlar aparmaq istəmir və faktiki olaraq onlar Fernandeşin başqa kluba satılmasını gözləyirlər.

Daha öncə ''Qalatasaray''da da top qovmuş bu futbolçu ''Beşiktaş''da 3-cü mövsümünü keçirir. ''Beşiktaş'' ilə 2027-ci ilə qədər müqaviləsi olan Fernandeş bu mövsüm 45 rəsmi oyunda 10 qol, 2 məhsuldar ötürməlik performans sərgiləyib. O, karyerasının ən məhsuldar mövsümünü keçirir.