''Qalatasaray'' bu qışın ilk transferini reallaşdırmağa yaxındı. Belə ki, Ərən Elmalıya görə ''Trabzonspor''la aparılan danışıqlar uğurlu şəkildə irəliləməkdədi.

''Football-plus.az'' xəbər verir ki, tərəflər artıq ilkin razılıq əldə ediblər və Trabzon təmsilçisi İstanbul nəhənginin 3 milyon avroluq təklifini qəbul edib. Müqaviləyə şərtlərə bağlı olan 500 min avroluq bonus, eləcə də sonrakı satışdan 20 faiz pay da əlavə ediləcək. Ərənin ''Cim-Bom''da illik maaşı isə 1 milyon avroya yaxın olacaq.

Bu transferdə ən çox baş məşqçi Okan Buruk israr edir. Təcrübəli mütəxəssis müdafiənin solunda oynayan və Türkiyə yığmasına da daimi dəvət alan 24 yaşlı futbolçunu çox bəyənir. Buruk Elmalını yeni səviyyəyə qaldıra biləcəyini düşünür. Elmalının gəlişi ilə həm heyətdə yerli futbolçuların sayı artacaq, həm də Burukun müdafiənin solunda alternativləri güclənəcək. Məşqçi bu futbolçuya tək tez-tez zədələnən İsmail Yakobsun əvəzləyicisi kimi baxmır. Burukun fikrincə, Elmalı 3 müdafiəçili takitakaya da tam uyğun gəlir və sol mərkəz müdafiəçisi kimi oynamağa qadirdi. Bundan başqa o, Ərəndən lazım gəldikdə dayaq yarımmüdafiəçisi kimi də faydalanmaq niyyətindədi.

Ən əsası istedadlı futbolçu özü də ''Qalatasaray''da oynamağa can atır. Türkiyə kubokunda ''Alanyaspor''a qarşı oyunda Elmalının adının ''Trabzonspor''un iştirak ərizəsinə salınmaması bu keçidin bitmək üzrə olması barədə iddiaları daha da artırıb.

Yanvarın 13-də ''transfer pəncərəsi'' açılan kimi ''Qalatasaray''ın bu keçidi rəsmən açıqlayacağı gözlənilir. ''Kasımpaşa''nın yetirməsi olan və 2022-dən trabzonluların şərəfini qoruyan Ərən bu mövsüm 19 rəsmi oyunda iştirak edərək aktivinə 1 məhsuldar ötürmə yazıb.

ƏLİ