''Qalatasaray'' ilə klubun və Türkiyə futbolunun tarixinə damğa vurmuş Fernando Musleranın yolları rəsmən ayrılmaq üzrədi.

Bu gün uruqvaylı qapıçı qazandığı titullarla birlikdə əvvəlcə ''Rams Park''da fotoreportyorlar üçün şəkillər çəkdirdi.

Xatırladaq ki, 38 yaşlı qapıçı 2011-ci ildən şərəfini qoruduğu ''Qalatasaray''la 8 çempionluq, 6 superkubok və 5 ölkə kuboku olmaqla 19 titul qazanıb. ''Qalatasaray''ın sonuncu çempionluğunun ardından Muslera əfsanəvi Bülənt Korkmazı geridə qoydu və Türkiyə futbolu tarixinin ən titullu oyunçusuna çevrildi! Qazandığı kuboklarla şəkillər çəkdirdikdən sonra Muslera jurnalistlər üçün mətbuat konfransı keçirdi. Onunla yanaşı mətbuat konfransında başqan Dursun Özbək də iştirak etdi.

Muslera həftəsonu ''İstanbul BŞ'' ilə ev oyununda sonuncu dəfə ''Qalatasaray''ın formasını geyəcəyini vurğuladı. O, eyni zamanda ''Qalatasaray''la avrokubok qazana bilməməyin hər zaman qəlbində bir yara kimi qalacağını qeyd etdi. ''Qalatasaray'' da rəsmi sosial şəbəkə səhifələrində qapıçı üçün vida paylaşımı etdi.