Ardıcıl 3-cü, tarixinin 25-ci çempionluğunu qazanan ''Qalatasaray''da ilin ən mediatik, yəni mediada ən çox adı hallanan futbolçuları bəlli olub.
"Football-plus.az" xəbər verir ki, rekordları alt-üst edərək mövsümə damğa vuran Viktor Osimhen bu göstəricidə də böyük fərqlə liderdi.

Belə ki, 1 yanvar - 20 may tarixləri arasında nigeriyalı forvardın adı ümumilikdə 4 milyon 323 min xəbərdə hallanıb! Osimhen bu göstərici ilə nəinki ''Qalatasaray''ın, bütövlükdə Türkiyə çempionatının açıq-ara fərqlə ən mediatik futbolçusu olub. İkinci pillədə Fernando Muslera qərarlaşıb.

Mövsümün sonunda 14 illik ''Qalatasaray'' karyerasını başa vurmağa hazırlaşan ünlü uruqvaylı qapıçı bu mövsüm əldə etdiyi iki titul ilə birlikdə Bülənt Korkmazı geridə qoydu və Türkiyə futbolu tarixinin ən titullu oyunçusuna çevrildi.

''Qalatasaray''da 8 çempionluq olmaqla 19 titul qazanan Muslera ilə bağlı bu il idman mediasında 1 milyon 330 min xəbər paylaşılıb. Üçüncü pillədə isə Barış Alpər Yılmaz qərarlaşıb.

Faydalı oyunu ilə fanatların sevimlilərindən biri olan Barış ilə bağlı isə həmin tarixdə 1 milyon 242 min xəbər paylaşılıb.