Yığmanın baş məşqçisi Fernando Santuş Latviya və Macarıstan milliləri ilə oyunlar üçün 25 nəfərlik heyət açıqladı. Düzdü, portuqaliyalı mütəxəssis seçimi ilə bağlı bir çox əsas suala aydınlıq gətirdi. Mən isə belə hesab edirəm ki, yığmaya bir neçə başqa futbolçunu da dəvət etmək olardı.

Vüsal İsgəndərli. Santuşun gözdən çıxardığı, legioner həyatı yaşayan futbolçulardandı. Milliyə cəlb olunan mərkəz hücumçularını nəzərə alsaq, Vüsalın məhsuldarığı onlardan geri qalmır.

Qismət Alıyev. “Qarabağ”ın ikinci, hətta üçüncü sağ cinah müdafiəçisi Abbas Hüseynovun əvəzində mövsüm ərzində ideala yaxın oyun göstərən “Zirə”nin lideri, kapitanı Qismət də dəvət oluna bilərdi.

Qara Qarayev. Heç yerdə milli karyerasını başa vurduğunu açıqlamayıb. De Byazi Qaranın boyunun kiçik olmasını bəhanə edirdi. Bəs Santuş hansı əsasla Qaranı milliyə çağırmır? Bu gün ən yaxşı təsir bağışlayan iki dayaq yarımmüdafiəçisindən biri Qaradı.

Elvin Camalov. O biri də Elvin. “Neftçi” karyerası nə qədər uğursuz olsa da, həm “ağ-qaralar”da, həm də millinin son oyunlarında da gördüyümüz odu ki, meydanda can qoyan tək-tük futbolçulardan biri məhz Elvindi.

Edqar Adilxanov, Rüfət Abbasov. Düzdü, U-21 yığmasına lazım olan fiqurlardı. Amma bu prizmadan yanaşsaq, orda oynamalı olan birinci futbolçu Nəriman Axundzadədi. Həm Edqar, həm də Rüfət hazırda ən yaxşı, sabit, formada olan yerli futbolçulardı. Bu səbəbdən də həm motivasiya vermək, həm də oynadıb, təcrübə qazandırmaq məqsədi ilə Ayxan Abbasovun “silahlarını” əsas milliyə çağırmaq lazım idi.

MÜZƏFFƏR QULUZADƏ