Çempionluğu ötən həftə rəsmiləşdirən və mövsümü iki titulla tamamlayan ''Qalatasaray''ın qarşıda hələ iki oyunu var. İstanbul nəhəngi bu gün 37-ci tur çərçivəsində ''Göztəpə''nin qonağı olacaq.

"Football-plus.az" lomanda Okan Burukun başçılığı altında həmin oyuna hazırlığını davam etdirir. Cümə axşamı baş tutan məşqin ən diqqətçəkən məqamı isə Mauro İkardinin nəhayət, geri dönməsi oldu.

Düzdü, Viktor Osimhen argentinalı forvardın yoxluğunu hiss etdirmədi. Həm də İkardi onsuz da bu mövsüm qalan oyunlarda meydana çıxa bilməyəcək. Onun adı iştirak ərizəsində yoxdu. Amma fanatların sevimlisi olan təcrübəli forvardın məşqlərə başlamasının özü artıq sevindirici xəbərdi. İkardi komanda ilə birlikdə məşq etməsə də, meydanın kənarında yüngül qaçış və başqa hərəkətlərlə fərdi şəkildə məşqə başlayıb.

Xatırladaq ki, İkardi ötən ilin noyabrın 7-də ''Tottenhem''lə qarşılaşmada dizindən ağır zədə almış və əməliyyat olunmuşdu. O, 6 aylıq, daha dəqiq desək, 196 günlük fasilədən sonra ilk dəfə ''Qalatasaray''ın məşqində iştirak edib.

İkardi bu müddət ərzində Vanda Naradan ayrılmağa və Çayna Suares ilə nişanlanmağa macal tapıb.