''Qalatasaray''ın göz bəbəyi Mauro İkardi nəhayət ki, uzun bir aradan sonra Türkiyəyə qayıdıb.

''Football-plus.az'' az xəbər verir ki, ünlü argentinalı forvard hələ noyabrın 7-də ''Tottenhem''lə oyunda dizindən ağır zədə alaraq mövsümün sonuna qədər sıradan çıxmışdı. Daha sonra fanatlarla vidalaşaraq vətəni Argentinaya yollanan İkardi dekabrın 2-də dizindən əməliyyat olunmuşdu.

Həmin vaxtdan sonra 31 yaşlı futbolçu uzun müddət şəxsi həyatındakı hadisələrlə gündəmə gəldi. Qalmaqalçı həyat yoldaşı Vanda Nara ilə indiyə qədər də boşanma prosesi davam edən İkardi yeni sevgisini elan edərək Çayna Suareslə eşq yaşamağa başladı. Şənbə günü axşam saatlarında isə İkardi təxminən 2 aylıq fasilədən sonra yeni sevgilisi ilə birlikdə İstanbula gəldi. Hava limanında fanatlar yeni cütlüyü böyük hay-küylə qarşıladı.

Bazar günü səhər isə İkardi bazaya gələrək ''Qalatasaray''ın məşqini ziyarət etdi. Klubun paylaşdığı şəkillərdə argentinalının baş məşqçi Okan Burukla söhbət etdiyi görünür. Onun mövsümün sonuna qədər meydana çıxması gözlənilmir.

Bu arada bazar günü günorta saatlarında İstanbul nəhənginin yeni transferi Alvaro Moratanın da İstanbula gəldiyini bildirək. Təcrübəli ispaniyalı forvard hava limanında böyük izdihamla qarşılanıb. 32 yaşlı futbolçu ilə ilyarımlıq müqavilə imzalanacağı gözlənilir. Keçidin detalları ən qısa müddətdə rəsmən açıqlanacaq.

ƏLİ