“Karyeramı başa vurmaq qərarı mənim üçün asan olmadı. Amma bir o qədər də bu addımı atmağa məcbur idim. Çünki dizimdəki ağrılar, zədələr həm məşqlərdə, həm də oyunlarda bütün gücümü qoymağa imkan vermirdi. Artıq hiss edirdim ki, komandaya tam güclə kömək edə bilmirəm. Bu səbəbdən də bir yol ayrıcına gəlmişdim. Uzun müddət idi bu barədə düşünürdüm. Qərara gəlmişdim ki, mövsümün sonunda bu addımı atacağam. Əslində bu qərarı verəcəyimi ailəm, dostlarım bilirdi. Lakin çox adama deməmişdim. Çətin olsa da, artıq belə qərar vermişdim, fikrimdə qəti idim. İndi isə bu qərarı rəsmi şəkildə elan etməyin zamanı gəlib çatdı. Bayaq qeyd etdiyim kimi, bu qərarı qəfil vermədim. Artıq 5-6 ay öncədən düşünməyə başlamışdım. Mövsümün sonunda karyeramı başa vurmağın vaxtının çatdığını hiss edirdim - həm fiziki, həm də psixoloji cəhətdən. Düşündüm ki, vaxtında dayanmaq və yerimi gənclərə vermək daha doğru olar. Futbolun içində qalmaq niyyətindəyəm. Nələrin baş verəcəyini öncədən söyləmək çətindu. Neçə illərdi futboldayam, bu mühitə çox bağlıyam. Karyeramı məşqçi kimi davam etdirmək istərdim”.