Bilindiyi kimi, Ağabala Ramazanov karyerasını bitirməyə qərar verib.

Özü də 31 yaşında. “Səbail”in ötən mövsümə qədər kapitanı olan futbolçunun belə addım atması gözlənilməz oldu. Belə ki, premyer-liqanın 12-ci turunda “Turan Tovuz”un oyunçusu Faiq Hacıyevlə toqquşaraq ağır zədə alan futbolçu 5 ay yaşıl meydandan uzaq düşmüşdü. 31-ci turda əlavə vaxtda şans qazanan Ramazanov ondan sonra sözün əsl mənasında gözdən itdi. Hər kəs kapitanın dönüşünü gözlədiyi halda, bitirmək qərarı verdi. Qaranlıq qalan suallara cavab tapmaq və gələcək planlarını öyrənmək üçün Ağabala ilə söhbətləşdik.

- Əvvəlcə indiki durumunu bilmək istərdim, özünü necə hiss edirsən?
- Hazırda səhhətimlə bağlı heç bir problem yoxdu.

- Karyeranı erkən bitirdin. Bu qərarı necə verdin, sənin üçün çətin olmadımı?
- Çətin qərar idi... Məyus olsam da, artıq qərarımı vermişəm.

- Səni mövsümün sonlarına yaxın yaşıl meydanda gördük. Futbolçu kimi bu oyununun son olacağını özlüyündə hiss elədin? Yəni əvvəlki kimi ola bilməmək, yoxsa şans qazanmamaq bu qərarı verməyə vadar etdi?
- Aldığım zədədən sonra məlum idi ki, mənə zaman lazımdı. Ona görə ki, özümü bərpa edim. Sağ olsunlar, o zamanı da mənə vermədilər. Həyat davam edir.

- Bəs karyeranı bitirəcəyin barədə qərar verərkən qardaşınla, yoxsa Şahin Diniyevlə məsləhətləşdin?
- Məsləhət edəsi olsam, öz qardaşımla edərəm.

- “Səbail”dən belə ayrılandan sonra incikliyin qaldımı ki, niyə bir vida matçı təşkil edilmədi? Yaxud “dənizçilər”i necə xatırlayacaqsan?
- “Səbail”də Aftandil Hacıyevin vaxtında qazandığım uğurları xatırlayıram (2018-22 - red.). O illərlə bağlı bir çox xoş hadisələr var.

- Meydanda toqquşduğun Faiq Hacıyev olanlardan sonra səninlə əlaqə saxladımı? Ümumiyyətlə, baş verənlərdən sonra incikliyin kimədi?
- Faiq istəməzdi belə olsun. Amma bu futboldu. Cavandı, karyerasında uğurlar arzulayıram. Ona qarşı heç bir incikliyim yoxdu.

- Futbolçu karyeranı bitirdin. Bundan sonrakı planlarını bilmək istərdim...
- Məşqçilik kurslarına qoşulucam. Sevdiyim peşəni davam etdiricəm.

- Ağabala Ramazanov deyəndə “Xəzər-Lənkəran”, “İnter”, “Qarabağ”, “Neftçi” yada düşür. Karyeranın ən unudulmaz və əvəzedilməz vaxtları harada keçib?
- Bir çox komandalarda yadda qalan vaxtlarım olub. Ona görə ayrıca ad çəkməyəcəm.

- Zaur Ramazanov illər əvvəl müsahibəsində “istərdim qardaşım məndən yaxşı futbolçu olsun” demişdi. Bu sözə cavabın?
- Onun üçün bir qədər düşünmək lazımdı (gülür).

RÖYANƏ OĞUZ