Mövsümü ikinci pillədə tamamlayan ''Fənərbaxça''da bir tərəfdən Joze Mourinyonun gələcək taleyi müzakirə olunursa, digər tərəfdən yavaş-yavaş yeni namizədlər ortaya çıxır.

Portuqaliyalı mütəxəssisə külli miqdarda təzminat ödəmək istəməyən və bu problemdən qurtulmağın yollarını axtaran rəhbərlik digər namizədləri də diqqətdə saxlayır. Son günlərdə Edin Terziçin adı sürpriz şəkildə ''sarı-lacivərdlilər''lə yanaşı hallanmışdı. Mourinyo ayrılacağı təqdirdə iddialara görə onu məhz Terziç əvəzləyə bilər.

Dünən isə bu mövzuda daha bir sürpriz olay yaşandı. Belə ki, Terziç İstanbulda görüntüləndi! Onun Türkiyəyə nə üçün gəldiyi bilinməsə də, bu olay fanatlar arasında həyəcana və müzakirələrə səbəb oldu. Qeyd edək ki, 42 yaşlı mütəxəssis Türkiyə futboluna heç də yad sima deyil. O daha öncə 2013-15-ci illərdə ''Beşiktaş''da Slaven Biliçin köməkçisi kimi işləyib.

Bu mütəxəssisin adı bu mövsüm Ole Qunnar Sulşerdən öncə ''Beşiktaş'' ilə də yanaşı hallanmışdı. Amma həmin vaxt Terziç təklifi qəbul etməmişdi. Çünki Angelos Postekoğlunun yerinə ''Tottenhem''in başına keçmək ehtimalı var idi. Terziç hələ ki, futbol dünyasında yalnız Dortmund ''Borussiya''sını iki fərqli dönəmdə çalışdırması ilə populyarlıq qazanıb. 2020/21-də o, Lüsyen Favrın qovulmasından sonra müvəqqəti olaraq ''arılar''ın başına keçmiş və komanda ilə ölkə kubokunu qazanmışdı. İkinci dönəmi isə 2022-24-cü illəri əhatə etmişdi. Terziç ilə ''Borussiya'' 2022/23-də son turda çempionluğu əldən verdisə, ötən mövsüm Çempionlar Liqasında finala qədər irəliləməsi ilə diqqət çəkdi.

Xorvatiyaəsilli almaniyalı məşqçi bir ilə yaxındı, işsizdi.