“Fənərbaxça” camiəsində son aylarda Joze Mourinyoya etimad artmışdısa, derbidəki məğlubiyyətdən sonra ünlü portuqaliyalı məşqçi yenə tənqid obyektinə çevrildi.

Əslində psixoloji üstünlüyə yiyələnmək üçün “Fənər”in əlinə çox gözəl fürsət düşmüşdü. Çünki ötən tur “Beşiktaş”a uduzan “Qalatasaray”ın bu həftəsonu oyunu yoxdu. “Fənər” əzəli rəqibini kubokda yendikdən sonra həftəsonu “Trabzonspor”u da məğlub edərək xal fərqini 3-ə endirməyi planlaşdırırdı. Ancaq bu mövsüm evdə ikinci dəfə “Qalatasaray” önündə yaşanan məğlubiyyət həm komandanın, həm də Mourinyonun nüfuzuna ciddi zərbə vurdu. Aprelin 2-də, yəni oyun günü həm də başqan Əli Koç 58-ci doğum gününü qeyd edirdi. Şəxsi işləri ilə bağlı Amerikada olan Koç doğum günü hədiyyəsi kimi derbidə qələbə gözləsə də, komandası onun ümidlərini doğrultmadı.

Türkiyə mətbuatının iddiasına görə, matçın ardından yönəticilər bir toplantı keçirdilər. Komandanın son durumu və hədəflərinin müzakirə olunduğu toplantıya ABŞ-dan canlı yayınla Əli Koç da qatıldı. İddialara inansaq, son məğlubiyyət Koçun da Mourinyoya dəstəyinin azalmasına səbəb olub. Halbuki başqan mövsüm bitmədən bu məşqçi ilə yeni müqavilə imzalamaq istəyirdi.

Bu mövsüm İstanbul nəhənglərinə qarşı keçirdiyi 4 rəsmi oyunun hamısında qələbəyə həsrət qalan (1 heç-heçə, 3 məğlubiyyət) Mourinyonun intizamsızlığı isə Okan Burukun burnunu sıxması ilə yenidən müzakirə mövzusuna çevrilib. ÇL-in ikiqat qalibi olan bu məşqçi hələ ki Türkiyə futbolundan baş çıxara bilmir. Həmkarının burnunu sıxmaqla qırmızı vərəqə alan Mourinyoya ya 1-3, ya da 5-10 oyunluq cəza veriləcək. Maraq üçün bildirək ki, portuqaliyalı məşqçi bu mövsüm 8-ci dəfə vərəqə gördü. Bunların 6-sı sarı, 2-si qırmızı vərəqədi.

Ən maraqlısı odu ki, “Fənərbaxça”da bu mövsüm heyətdə yer alan futbolçulardan heç biri (!) Mourinyo qədər cəzalanmayıb. Əslində bu, çılğın xarakteri ilə tanınan 62 yaşlı mütəxəssis üçün yeni durum deyil. O, əvvəlki klublarında da həmişə hakimlərlə mübahisə edən və tez-tez cəzalanan məşqçi kimi tanınırdı. Türkiyəyə gəlməmiş İtaliyada işləyən Mourinyo “Roma”nı çalışdırdığı 2,5 il ərzində 14-ü sarı, 6-sı qırmızı olmaqla ümumilikdə 20 vərəqə görmüşdü. Onun bir mövsümdə şəxsi rekordu 10 vərəqədi (2022/23). Yəni Mourinyo bu mövsümün sonuna qədər daha 3 dəfə vərəqə alsa, şəxsi rekordunu yeniləyəcək.

Sonda qeyd edək ki, Mourinyo Dorival Junior ilə yollarını ayıran Braziliya yığmasının başına keçməyə namizəd olan 4 məşqçidən biridi. Bunu braziliyalı jurnalist Abdre Rizek açıqlayıb. Digər isimlər Jorje Jezuş, Karlo Ançelotti və Abel Ferreyradı.

Bu məşqçilər arasında ən real namizəd daha öncə Braziliyada çalışdığı üçün bu ölkəni yaxından tanıyan və yayda “Əl-Hilal”dan ayrılacağı gözlənilən Jorje Jezuşdu.