''Beşiktaş'' tarixinin ən uğursuz mövsümlərindən birini keçirməkdə davam edir.

Komandanın liderlə xal fərqi 37-yə bərabərdi! İstanbul nəhəngini bu mövsüm artıq 5 fərqli məşqçi çalışdırıb. Yeni rəhbərlik seçildikdən sonra Fernando Santuşla anlaşsa da, bu portuqaliyalı mütəxəssisə artıq inam tamamilə itib. Santuş ''Qartal''ın başında ilk 12 superliqa matçının cəmi 4-də, yəni 33 faizində qələbəyə sevinib ki, bu da son 37 ildə klubun bütün məşqçiləri arasında ən pis göstəricidi. Onun təzminatında 500 min avroluq maddə var.

Bu arada Türkiyənin ''Sabah'' nəşrinin yazdığına inansaq, rəhbərlik yayda Santuşla vidalaşmaq niyyətindədi və onun yerini tutmağa iki əsas namizəd var. Bunlardan biri Edin Terziç, digəri isə Qurban Qurbanovdu! Dortmund ''Borussiya''sının başında ötən mövsüm çempionluğu möcüzəvi şəkildə əldən verən, bu mövsüm isə komandanı ÇL-də 1/4 finala daşıyan Terziçin yayda ayrılacağı gözlənilir. Yeri gəlmişkən, ''Beşiktaş'' bu məşqçiyə gözəl tanışdı. Terziç vaxtilə İstanbul nəhəngində Slaven Biliçin köməkçisi kimi çalışıb.

Qurbanovun ''Qarabağ''ın başında əldə etdiyi uğurlar ''Beşiktaş'' rəhbərliyinin də diqqətini yenidən cəlb edib. Martın ortalarında da təcrübəli mütəxəssisin adı ''Beşiktaş''la yanaşı hallanmışdı. Ağdam klubunun başında 9-u ölkə çempionluğu olmaqla 14 titul qazanan 51 yaşlı Qurbanovun ''Qarabağ''la müqaviləsinin müddəti gələn il başa çatacaq.

ƏLİ