''Qalatasaray''la gərgin çempionluq mübarizəsi aparan ''Fənərbaxça'' digər tərəfdən yavaş-yavaş yeni mövsümün planlarını cızmağa başlayıb.

''Football-plus.az'' xəbər verir ki, Joze Mourinyonun yeni mövsümdə komandanın qalmaq ehtimalı ayrılmaq ehtimalından daha çoxdu.

Bu mövsümkü çempionluq mübarizəsinin nəticəsindən asılı olmayaraq rəhbərlik ünlü portuqaliyalı məşqçi ilə yola davam etmək niyyətindədi. Mourinyonun 2026-ya qədər müqaviləsi var. Hətta rəhbərlik onun müqaviləsini yeniləmək arzusundadı. Bu da o deməkdi ki, ''Fənər''də son 52 ildə bir ilk yaşana bilər.

Belə ki, 1973-cü ildən bu yana bu komandada ilk mövsümündə çempion ola bilməyən məşqçinin yeni mövsümə də bu vəzifədə başlaması faktına rast gəlinməyib! Sonuncu dəfə ilk mövsümdə çempion olmadan vəzifəsini qoruyan mütəxəssis Didi olub. Braziliyalı məşqçinin ilk mövsümündə, yəni 1972/73-də ''Fənər'' ikinci pilləni tutsa da, rəhbərlik onunla yoluna davam etmişdi. Bu, doğru qərar olmuş və komanda sonrakı iki mövsümdə bu məşqçi ilə çempionluqlar əldə etmişdi. Düzdü, Vitor Pereyra da 2015/16-da ilk mövsümdə ''Fənər''i çempion edə bilmədikdən sonra faktiki olaraq işini davam etdirmişdi. Amma komanda növbəti mövsümün ilk rəsmi oyunlarında ümidləri doğrulda və Çempionlar Liqasının təsnifat mərhələsində ''Monako'' səddini aşa bilmədikdən sonra portuqaliyalı mütəxəssis istefaya göndərildi.

Həmin vaxt superliqada yeni mövsüm hələ start götürməmişdi.