Ötən yay baş tutan prezident seçkiləri zamanı fanatlara və klubun rəsmi üzvlərinə ''sizə elə bir heyət quracam ki, çempionluqla bağlı söz verməyimə ehtiyac qalmayacaq'' deyən başqan Əli Koç ''Fənərbaxça'' tarixinin ən bahalı heyətini qurmasına və Joze Mourinyo kimi bir məşqçini gətirməsinə baxmayaraq yenə də əsas hədəfə çatmaq mümkün olmadı.

Amrabat, Sen-Maksimen, Ən-Nəsiri, Şkrinyar, Talişka kimi ulduzların transfer edilməsinə və komandanın demək olar, əvvəldən sona qədər çempionluq yarışının içində olmasına baxmayaraq ''Fənər''lə bağlı bir məqam diqqət çəkdi.

Belə ki, İstanbul nəhəngi bu mövsüm heç bir turu lider kimi tamamlaya bilmədi! İlk iki turda ''Beşiktaş'' zirvədə qərarlaşdı. 3-cü turdan etibarən isə ''Qalatasaray''ın hegemonluğu başladı və komanda sona qədər də liderliyi əldən buraxmadı. 2019-dan bu yana, yəni son 5 mövsümdə ''sarı-lacivərdlilər'' belə uğursuzluq yaşamamışdı.

Ümumilikdə isə ''Fənər'' tarixi ərzində 18-ci dəfə bir mövsümü əvvəldən sona qədər liderliyə yüksələ bilmədən tamamlamış oldu.