Belə görünür ki, ''Fənərbaxça''nın çempionluq həsrətinə əzəmətli Joze Mourinyo da son qoya bilməyəcək. Çünki komanda mövsümü qeyri-sabit keçirməkdə və xalları sağa-sola paylamaqda davam edir.

17-ci turun açılış oyununda İstanbul nəhəngi debütant ''Eyüpspor''un qonağı oldu. İstanbulu təmsil edən ''Eyüpspor'' tarixində ilk dəfə elitada oynamasına baxmayaraq heç də pis təsir bağışlamır. Tura 4-cü pillədə daxil olan Arda Turanın komandası iki həftə öncə səfərdə ''Qalatasaray''ı büdrətmişdi. Ona görə də ''sarı-lacivərdlilər''in işinin asan olmayacağı bəlli idi. Belə də oldu.

İlk yarıda Ahmed Kutucu və Yussef Ən-Nəsirinin qarşılıqlı qolları oyunun nəticəsini müəyyənləşdirdi. ''Fənər''in vurduğu qola çılğın şəkildə etiraz edən Arda Turan qırmızı vərəqə alaraq tribunaya göndərildi. ''Qalatasaray'' bu tur səfərdə ''Kayserispor''u yenəcəyi təqdirdə zirvədə xal fərqi 8-ə yüksələcək! Evdə pis-yaxşı xalları toplamağı bacaran ''Fənər'' səfərdəki xal itkilərinə isə bir çarə tapa bilmir. Komanda superliqada son 5 səfər oyununda 7 xal itirib (2 qələbə, 2 heç-heçə, 1 məğlubiyyət). Mourinyonun komandası açıq-aşkar hər göstəricidə İsmayıl Kartalın ötən mövsümkü komandasından geridədi! ''Fənərbaxça'' bu mövsüm 16-cı turu 36 xal, 40 qol göstəriciləri ilə tamamladığı halda ötən mövsüm 16-cı turdan sonra komandanın aktivində 43 xal və 44 qol var idi! 2023/24-də komanda bütün mövsüm ərzində cəmi 15 xal itirmişdisə, bu mövsüm artıq ilk 16 turda 12 xal itirilib. Bundan başqa Mourinyo üst pillələrdə qərarlaşan rəqibləri məğlub etməyin yolunu heç cür tapa bilmir.

''Eyüpspor''la qarşılaşmadan sonra ortaya maraqlı bir görüntü çıxdı. Belə ki, ''Fənər'' hazırda turnir cədvəlinin ilk 6 pilləsində qərarlaşan rəqiblərin heç birini məğlub edə bilməyib! Belə ki, ''Qalatasaray'' (1:3) və ''Beşiktaş''la (0:1) oyunlarda məğlubiyyətlər, ''Samsunspor'' (2:2), ''Göztəpə'' (2:2) və ''Eyüpspor''la (1:1) oyunlarda bərabərliklər qeydə alınıb.

ƏLİ