''Fənərbaxça'' Joze Mourinyonun başçılığı altında uğursuz oyunlar seriyasını davam etdirir.

Ötən həftəsonu ''Fənər'' İstanbul derbisində səfərdə ''Beşiktaş''a uduzmaqla çempionluq yolunda çox ciddi zərbə almışdı. Dünən isə İstanbul nəhəngi Avropa Liqasının əsas mərhələsinin 6-cı turunda doğma fanatları önündə ''Atletik'' ilə qarşılaşdı. İspaniya təmsilçisi İnyaki Uilyamsın ilk yarıda vurduğu 2 qol sayəsində 2:0 hesablı inamlı qələbə qazandı. 69-cu dəqiqədə Mərt Müldürün ikinci sarı vərəqəni alması ilə meydan sahibləri azlıqda qaldılar. Həm ilk yarının, həm də matçın sonlarında ''Fənər'' fanatlarının prezident Əli Koçu istefaya səsləməsi diqqət çəkdi.

Yeri gəlmişkən, Koç özü də matçı tribunadan izləyirdi və etirazlardan sonra 88-ci dəqiqədə oyun bitməmiş stadionu tərk etdi! ''Fənərbaxça'' İspaniya təmsilçilərinə qarşı 12-ci qarşılaşmada 10-cu məğlubiyyətlə üzləşdi (2 qələbə). Mourinyo isə məşqçi karyerasında bir ilki yaşadı. Belə ki, onun çalışdırdığı komanda AL-də evdə ilk dəfə qol vurmadan məğlub oldu.

Buna qədər onun kollektivləri bu turnirdə 24 ev oyununun heç birində bu cür aqibətlə üzləşməmişdi. 6 turdan sonra aktivində 8 xal olan ''Fənər'' turnir cədvəlində 15-ci pillədə qərarlaşıb. Maraqlıdı ki, ''Atletik'' növbəti turda öz meydanında İstanbulun digər nəhəngi ''Beşiktaş''ı qəbul edəcək.

ƏLİ