Anderson Talişkanın transferini heç cür tamamlaya bilməyən ''Fənərbaxça'' diqqətini başqa ulduz futbolçuya yönəldib.

''Football-plus.az'' xəbər verir ki, söhbət Joao Felişdən gedir. Əslində İstanbul nəhəngi portuqaliyalı ulduzla çoxdan maraqlanır. Sadəcə rəhbərlik əsas diqqətini Talişkaya yönəltdiyindən Feliş alternativ variant hesab olunurdu. Amma hətta həmin vaxt da belə şayiələr dolaşırdı ki, Joze Mourinyo Talişkanın yox, məh Felişin transfer edilməsinin tərəfdarıdı.

Türkiyə mətbuatının yazdığına inansaq, Mourinyo öz həmyerlisi olan bu futbolçuya zəng vuraraq özü şəxsən onu ''Fənərbaxça''ya dəvət edib. Ünlü mütəxəssis ona həm karyerasında yeni səhifə açmağı, həm ''Fənər''in lideri olmağı, həm də klubu irəli daşımağı təklif edib. İddialara görə 25 yaşlı futbolçu Türkiyəyə gəlməyə razılıq verib. Ancaq klublar arasında hələ rəsmi danışıqlar başlamayıb. ''Sarı-lacivərdlilər'' bu futbolçunu icarəyə götürməyə çalışacaqlar.

Talişka ilə danışıqlarda olduğu kimi bu transferdə də əsas rolu vitse-prezident Acun Ilıcalı oynayacaq. Dəqiq olan bir şey var ki, ''Çelsi'' Felişin performansından çox narazıdı və onunla artıq bu qış vidalaşmağın əleyhinə deyil. London nəhəngi Felişi mövsümün əvvəlində 50 milyon avroya ''Atletiko''dan transfer edib.

Əsas heyətə düşməkdə çətinlik çəkən hücumameyilli yarımmüdafiəçi bu mövsüm iştirak etdiyi 17 rəsmi oyunda 5 qol, 2 məhsuldar ötürmə ilə fərqlənib.

ƏLİ