Kartal “Fənərbaxça”da qalmayacaq

Çempionluq şansını möcüzəyə buraxan ”Fənərbaxça” camiəsində hələ ki səssizlik hökm sürür. İndi camiədə çoxlarını çempionluq mübarizəsindən çox qarşıdan gələn prezident seçkisi və baş məşqçi İsmayıl Kartalın gələcək taleyi maraqlandırır. Çünki sona 3 tur qalmış 6 xallıq fərqin aradan qalxması real görünmür.

Prezident seçkisinə gəlincə, Səadəttin Saranın sürpriz şəkildə namizədliyini irəli sürdüyü məlum oldu. Namizəd ola bilmək üçün idarə heyətinə 500 imza təqdim olunmalıdı. Saran bir neçə gün öncə verdiyi açıqlamada cümə gününə qədər Əli Koçun qərarını gözləyəcəyini bildirmişdi. Koç namizəd olacağı təqdirdə onunla qarşı-qarşıya gəlməyəcəyini və namizədliyini irəli sürməyəcəyini qeyd etmişdi. Amma Əli Koçdan cümə gününə qədər bir xəbər çıxmayınca, Saran namizədliyini irəli sürdü. İdarə heyətinin sədri Şekip Mosturoğlu bununla bağlı “Tivibu Spor” kanalına bunları dedi:

Camiədə çox sevilən və tanınan şəxslərdən olan, eləcə də Türkiyənin ən nüfuzlu iş adamlarından sayılan 60 yaşlı Saranın gələn həftə mətbuat konfransı keçirərək planları və hədəfləri barədə məlumat verəcəyi gözlənilir. Əli Koça gəlincə, daha öncə bir neçə dəfə namizəd olmayacağına işarə vuran indiki başqanın fikrini dəyişdiyi deyilir. “Sabah” nəşrinin yazdığına görə, Koç 3-cü dönəm üçün prezidentliyə namizəd olmağa qərar verib. Amma hələ ki onun ağzından bununla bağlı heç bir açıqlama çıxmayıb.

Bu arada klub tarixinin bir sıra göstəricilərini yeniləməsinə, mövsümün əvvəlində rəsmi matçlarda 19 oyunluq qələbə seriyası yaxalayaraq Türkiyə futbolunda yeni rekorda imza atmasına baxmayaraq, İsmayıl Kartalın gələcək taleyi ilə bağlı iddialar heç də müsbət deyil. Təcrübəli mütəxəssisin müqaviləsinin müddəti onsuz da bu mövsümün sonunda bitir. Bir çox mənbələrin yazdığına görə, başqanın kimliyindən asılı olmayaraq, Kartalla yollar ayrılacaq. Hətta Əli Koç yenidən başqan seçilsə belə, 63 yaşlı mütəxəssis vəzifəsində qalmayacaq. Böyük ehtimalla İstanbul nəhənginin yeni baş məşqçisi əcnəbi olacaq.

Qeyd edək ki, Kartal “Fənərbaxça”nın başında 3-cü dönəmini keçirir. Komanda bu mövsüm 55 rəsmi oyundan 41 qələbə, 7 heç-heçə, 7 məğlubiyyətlə ayrılıb ki, bu da orta hesabla hər oyuna 2,36 xal deməkdi.