Türkiyədə rəqib tanımayan ''Qalatasaray'' yeni mövsümdə artıq Avropada da adından söz etdirmək istəyir.

İstanbul nəhəngi heyətini tanınmış ulduzlarla gücləndirmək niyyətindədi. Belə futbolçulardan biri də Qranit Cakadı. Uzun illər ''Arsenal''dakı çıxışı ilə tanınan, ''Bayer-04''ün ötən mövsümkü tarixi çempionluğunda mühüm rol oynayan təcrübəli futbolçu mövsümün sonunda Almaniyanı tərk etməyə hazırlaşır.

Onun ayrılmaq istəməsinin başlıca səbəbi Xabi Alonsonun klubda qalmamasıdı. Əslində bu mövsümün gedişində ''sarı-qırmızılar''ın 32 yaşlı futbolçuya maraq göstərməsi barədə bir çox iddialar ortaya atılmışdı. Ancaq danışıqlar yalnız indi ciddiləşib.

''Fanatik'' nəşrinin məlumatına görə ulduz futbolçunun atası ötən həftə İstanbula gəlibmiş. O, həm ''Qalatasaray''ın məşq bazası ilə tanış olub, həm də rəhbərliklə danışıqlar aparıb. Okan Buruk da döyüşkən və çılğın xarakteri ilə seçilən 32 yaşlı albaniyalı yarımmüdafiəçini komandasında görmək istəyir. Dris Mertensin bu yay ayrılmasından sonra onsuz da ''Cim-Bom''da yarımmüdafiənin mərkəzində boşluq yaranacaq. Caka bu boşluğu doldurmaq üçün əla namizəddi. Hətta təklif olunan məbləğ də bəllidi. ''Qalatasaray'' ''Bayer-04''ə 6 milyon avro, futbolçunun özünə isə illik 3,8 milyon avro maaş təklif edib.

Hazırda Lukas Torreyranın da maaşı məhz bu qədərdi. Müqavilədə bonusların da yer alacağı gözlənilir. İddialara görə əslən kosovolu olan Caka və ailəsi də bu İstanbula köçməyə müsbət yanaşır. Əsasən dayaq yarımmüdafiəçisi kimi oynayan Caka bu mövsüm Leverkuzen təmsilçisində 49 rəsmi oyunda iştirak edərək aktivinə 2 qol, 7 məhsuldar ötürmə yazıb.