Bu mövsüm Türkiyə çempionatından başqa Avropa Liqasında da uğurlu çıxış etmək istəyən ''Qalatasaray''la bağlı mühüm bir transfer xəbəri yayılıb.

İstanbul nəhəngi mövsümün sonuna qədər sıradan çıxan Mauro İkardinin boşluğunu Paulo Dibala ilə doldurmaq niyyətindədi. Argentinalı ulduzun meneceri Karlos Novel artıq İstanbula gəlib.

Məlum olub ki, ''Cim-Bom'' Dibala ilə hələ ötən aydan etibarən maraqlanmağa başlayıb. Noyabrda yığma fasiləsində baş məşqçi Okan Buruk yönətici Abdulla Kavukçu ilə birlikdə tətil üçün bir neçə günlük İtaliyaya yollanmışdı. Həmin vaxt onlar ''Qalatasaray''la yaxşı əlaqələri olan menecer Corc Qardi ilə görüşmüş və transfer planını müzakirə etmişdilər. Məhz noyabrda ilk dəfə Dibalanın meneceri ilə əlaqə yaradılmışdı. Elə Buruk özü də bu futbolçu ilə gizli şəkildə görüşmüşdü. Ona görə də 31 yaşlı futbolçunun meneceri danışıqları davam etdirmək üçün İstanbula gəlib.

O, dünən tribunada ''Qalatasaray'' - ''Trabzonspor'' matçını da izləyib. Dibalanın ''Roma''dakı durumu heç də qənaətbəxş deyil. Paytaxt təmsilçisi mövsümü zəif keçirir və qışda komandanın heyətində çox ciddi dəyişikliklərin olacağı gözlənilir. Dibala illik 12 milyon avro maaşın qarşılığında ''Roma''ya gözlənilən faydanı verə bilmir. Ona görə də rəhbərlik qışda onunla vidalaşmaq, belə desək, bu futbolçunu dəyər-dəyməzinə satmaq istəyir. Çünki dünya çempionunun ''Roma'' ilə müqaviləsi mövsümün sonunda başa çatacaq. Düzdü, hələ birillik şərti müqavilə də mövcuddu. Amma bu şərt yalnız Dibala ən azı 25 rəsmi oyuna çıxdıqda qüvvəyə minəcək. Hazırda bu futbolçunun aktivində 18 oyun var.

Şayiələrə inansaq, ''Qalatasaray'' italyanlara 10 milyon avro təklif edib. Dibalanın ''transfermarkt''da dəyəri 12 milyon avro göstərilib. Dibalanın bu mövsüm 18 rəsmi oyunda yalnız 2 qol, 1 məhsuldar ötürmə ilə fərqləndiyini bildirək.

ƏLİ