“Qalatasaray” uzun müddətdi böyük problemlər yaşadığı müdafiənin sağ cinahını gücləndirmək niyyətindədi.

"Football-plus.az" xəbər verir ki, Saşa Boenin ayrılmasından sonra bu cinahda Leo Dyubua və Serj Orye kimi futbolçulardan istədiyi faydanı ala bilməyən Türkiyə çempionu bu mövsümün əvvəlində 9 milyon avroya Elias Yelerti transfer etdi. Amma gənc danimarkalı da hələ ki ümidləri doğrultmur.

Okan Buruk müdafiənin sağında Yelertdən çox Kaan Ayhana şans verir. Bəzi matçlarda isə bu mövqedə Barış Alpər Yılmazla Metehan Baltacı da şans qazanıb. Bu üzdən İstanbul nəhəngi diqqətini “Mançester Siti”nin və İngiltərə yığmasının təcrübəli müdafiəçisi Kayl Uokerə yönəldib. 2017-ci ildən bəri “şəhərlilər”in şərəfini qoruyan Uoker bu mövsüm əsas heyətə düşməkdə çətinlik çəkir. Xosep Qvardiola artıq onun ayrılmasının əleyhinə deyil.

“Qalatasaray”ın adından Uokerlə danışıqları Corc Qardi davam etdirir. “Cim-Bom”la sıx əlaqələri olan 43 yaşlı tanınmış italiyalı menecer İkardi, Mertens, Osimhen kimi ulduzların transferində də mühüm rol oynamışdı. “Milan”ın da maraq dairəsində olan Uoker illik 4 milyon avro maaş tələb edir. Qardi bu məbləği aşağı salmağa çalışır. Maaş məsələsində anlaşmaq mümkün olmasa, “Qalatasaray” ən pis halda bu futbolçunu icarəyə götürməyə çalışacaq. 34 yaşlı Uoker bu mövsüm “Siti”də 11-i start heyətində olmaqla 18 rəsmi oyuna çıxıb.

Yeri gəlmişkən, “Qalatasaray”la bağlı bir xəbəri də diqqətinizə çatdıraq. Belə ki, klub prezidenti Dursun Özbək əməliyyat olunub. Yanvarın 15-də Özbəyin klub üzvlərinin aylıq toplantısına qatılmaması diqqəti çəkmişdi. 2-ci başqan Mətin Öztürk onun səhhəti ilə bağlı problem yaşadığı üçün toplantıya qatılmadığını bildirmişdi. Prezident bağırsağında yaranan problemə görə əməliyyat olunub.